Ke importa la edad ke tengo? Tengo la edad ke kero i la edad ke me siento. Ke azer kon los dezeos alokados, sin pensar a lo ke va afitar. Kero bolarme, komo un pasharo libre, fuera de su nido, al deskonosido. Kero azer lo ke dezeo. Ke importa kuantos anyos tengo. No kero pensar a la edad. Unos dizen ya paso, ya so vieja, otros dizen, esto en el piko, todo se ve mas leshos, i kreyo mijor, mankos detayes, mankos problemes.
No es la edad ke tengo ni lo ke la djente dizen. Lo importante es de meter tino a lo ke muestro korason siente i lo ke murmura mi meoyo Tengo los anyos nesesaryos para gritar a boz alta a lo ke siento i azer lo ke kero. Agora no tienen ke dizir: Estas muy manseva no puedes alkansar, estas muy vieja no puedes reushir.
Tengo la edad de pueder ser mas kalma i de evaluar, malgrado todo, kon mas maturidad. Tengo la edad de mis suenyos ke se konvierten en esperanzas. Tengo los anyos en ke el amor es una loka yamada, ma una pasyon bien dezeada. Es una romansa komo la kaida del sol en el bodre de la mar al atardeser.
Kuantos anyos tengo? No nesesito markarlos kon numeros. Los anyos ke tengo son de muncha valor.
Las rugas ke tengo son mis trionfas i mi glorya al mundo.
Tengo los brasos yenos de eksperiensas ke me abrasan.
Tengo los anyos nesesaryos para azer lo ke dezeo sin sentir remorso. Ay ke tomar kon alegría lo ermozo, lo bueno i savorear el día ke mos regalo el Divino.
Bivi, vide, sinti, ami i ke me importa mi edad. Tengamos vidas larga i sanedad para gozar del momento.
Carpe Diem.
