Es alhad demanyana ke la kaleja ande moro (Maçka - ande se topa el Konsolato Siriano) estava yeno de Sirianos ke estavan muy kontentes de la mueva situasion en sus payiz. Reelmente muy difisil a kreer. Todos los ke eran kontra el rejim del Baas ke turo mas de 60 anyos en el payiz, kon la armada ke formaron reusheron a obtener la administrasion, si mizmo no es la administrasion, la direksion del payiz en una semana. Payiz dirijado por la famiya Esad los 60 anyos dalkavo, mos ambezamos agora ke no estava bastante fuerta. Kreo ke no uvo gerras ni batalyas en las kayes entre la armada Siryana i los milises ke son kontra el rejim.
Agora mos ambezamos ke mas de 3 miliones de Sirianos se topan en las tierras turkas. I estamos esperando ke una grande partida dospues de este trokamyento de poder van a empesar a tornar a sus payizes i a sus kazas. No se ken esta kontente i ken no. Ya se ke los Israelyanos no eran kontentes del rejim de Esad. I eyos agora vamos a ver si son kontentes o no. La Siria de Esad era sostenida por la Rusia de Putin i por los Persianos. Ma el punto dalkavo lo desharon sin dingun apoyo. Yo no se si reelmente esto kontente de esta situasion. Vimos las mizmas shenas dospues de Saddam en Irak (2006 - 18 anyos antes); i dospues de Kaddafi (5 anyos dospues en el 2011) en Libya. Dingunos alkansaron a formar un muevo governo para dirijar el payiz entero. Vamos a ver si estos son mas entelijentes i si van achetar todo modo de grupos para unifikar el payiz entero. Es reelmente muy difisil. Ya savemos ke el Prezidente Turko esta dando apoyo a este grupo ke son Muzulmanos fanatikos. Ma oy en diya estan trokando de diskorso, mizmo estan dando roportajes a las gazetas amerikanas. Ya savemos ke los Estados Unidos no tenian buenas relasyones ni kon Esad ni kon el grupo oposado. La situasion la mas emportante es para la Turkiya. Oy en diya no savemos mas kuantos miliones de Sirianos se topan en muestro payiz. Ma savemos ke son mas de 3 miliones i medio. Una lokura. I tyenen derechos mas anchos ke los sivdadinos turkos. Mizmo en mi fabrika tengo tres Sirianos ke lavoran ofisialmente. Kon la ley aktuala tenemos el derecho de emplear un lavorante estranjero para kada kinze lavorantes turkos. No es mi preferensia, ma semos ovligados porke dingunos no keren lavorar regularmente. Es una situasion inkreivle.
Esperamos ke esta situasion va ser para el bien de la Turkiya i una grande partida de los Sirianos ke biven en muestro payiz van a tornar atras.
