İzzet Keribar es un artisto famozo ke tuvo un muy grande entereso en la fotografia desde su manseves. En el anyo 1957, se fue a Korea por el servisyo militar i durante un anyo travo fotografias i mejoreo su teknika i su eksperyensya. Empesando de los anyos 1980, intensamente organizo viajes fotografikos en el paiz i en el etranjero i esta produsiendo munchas fotos.
El arshivo ke tyene de Turkiya i de las fotografias del mundo entero es muy importante.
El es un profesyonal i esta lavorando i ayudando por el developamyento de la Turkiya i para azer konoser la Turkiya en el etranjero kon sus mijores aspektos.
Empeso a travar fotografias kuando teniya 16 anyos. Para pueder ver lugares diferentes se fue a Korea komo volontaryo. Vijito 80 paizes.
Izzet Keribar es un artisto ke kreo el orizonte de una jenerasyon en torno a la fotografia.
El 01.12.2024 alhad demanyana mos fuimos kon mi tio i una amiga a la ekspozisyon de Viaje de Kolores de Izzet Keribar, ke tuvo lugar en el sentro Istanbul Modern en Tophane.
El reusho a reunir el publiko kon una seleksyon de su arshivo ke kontyene kaji un milyon i medyo de fotografias.
En esta ekspozisyon, estamos vyendo las fotografias ke kontyenen elementos formales komo kolor, luz, tekstura i elementos grafikos, el stilo variable de Keribar a lo largo de los anyos. Esta envitando los spektatores a un viaje kolorido de diferentas epokas i lugares.
La ekspozisyon es kompozada de sesh seksyones.
En la primera parte de la ekspozisyon mos esta amostrando en los anyos 1950, la vida kalejera ke se esta trokando muy presto en Estambol i los akontesimyentos, i inkluye ovras ke dokumentan las zonas urbanas i rurales de Korea del Sud.
En la sigunda parte de la ekspozisyon Izzet réuniso sus ovras ke rejistran la vida kotidyana en diferentes distriktos de Estambol desde los anyos 1980.
La tresera i la kuatrena partida se trata de la naturaleza i los paizajes urbanos ke utiliza Keribar, utilizando prinsipalmente luzes i kolores naturales para transformar lo ordinaryo en ekstraordinaryo, produsidos durante sus viajes a diferentes partes de la Turkiya i del mundo.
La sinkena parte trata sovre el artisto en varias partes del mundo prezenta al publiko los portres ke realizo.
La ultima parte de la ekspozisyon se sentra en las fotografias semi-abstraktas del artisto.
Es un viajero del arte bien ekipado. Felisitasyones Izzet, i syempre te oguro ke seyas reushido en tu ovra sakra.
