Oy vos kero kontar el Gulash, ke es spesyal de Hungarya. Gulash kijo dizir pastor. Esta komida tambiyen es popular en Chekya, Slovakya, Austriya, Serbiya i en Romanya. Gulash se aze kon karne, sevoya, pipirushka, tomat i espesias. Yo komi en Chekya i me iva komer i los dedos. Los amigos ke estavan viyajando kon mi, eyos lo gostaron en Hungarya, tambien i eyos se chuparon los dedos. Me ambezi de los chefes de Chekya komo se giza. Vos dare la resefta.
Ingredientes:
-1 Kilo de karne kortada komo kushbashi un poko grande
- 3 Sevoyas kortadas chikas
- 3 Dientes de ajo
- 1 kuchara de supa de azete
- 2-3 Pipirushkas
- 1 Kuchara de salsa de tomat
- 1 kuchara de dulse de paprika kolorada
- 1 kuchara de chay de pimienta preta
- 1 kuchara de dulse de oregano
- 1 kuchara de dulse de kimyon
- 1 kuchara de chay de sal
- 1 oja de dafne
- 1 kuchara de supa yeno de arina
- 800ml de agua
Aryento de una kacharola se mete la azete. Despues la sevoya, el ajo i las pipirushkas ke se kortaron chikas. Se sofriye todo. Despues se mete las espesias i se karishtereya. Aryento se echa las karnes i se sofriye. Agora se mete la salsa de tomat i en fin la agua. La karne en kozyendo, de la otra parte se mete la arina aryento de un chini ondo kon un poko de la agua de la komida, komo un kucharon, i se karishtereya i despues avagar avagar se mete aryento de la komida ke se esta kozyendo. Kuando se apura se abasha del fuego. Si keresh allado kon patatikas fritas o kon pure i allado kon un vaziko de vino se kome. La savor es maraviyoza.
