Se kreye ke los ichizeros tienen poderes mistikos en diferentes kulturas de la istorya umana. En leyendas, mitolojiyas i folklores, los ichizeros son reprezentados komo personas ke pueden alkansar a konosimyentos sovrenaturales, pueden realizar rituales majikos i pueden komunikar kon el mundo spiritual.
La ichizeriya es muy antigua komo la umanidad. Los primeros eran shamanes o lideres relijiozos de komunidades. En las sivilizasyones de Mezopotamia, en Ejipto Antiguo i en Gresya, los ichizeros eran muy respektados. Tanto ke se espantavan de eyos.
En la Evropa Medieval, la eglisia disho ke la ichizeriya es echo de los diavlos i se empeso a persekutir los ichizeros. Este periodo fue muy danjorozo para eyos. Ma kon el Renasimiento, la ichizeriya gano un interes muevo komo un arte i filozofiya mistika.
Los ichizeros son personas ke pueden kontrolar el avenir, tanbien azen majiya kon elementos spesyales. En algunas kulturas se kreyen ke melizinan las hazinuras kon plantas i pueden ver el futuro en mirando a las estreyas. Ay algunos ke uzan poderes sovrenaturales para propozitos malos.
Oy en diya los ichizeros son bastante komunes en la kultura popular. Ay munchos simbolos asosiados a la ichizeriya. Livros de ichizos, pentagrames, sirkulos majikos i mas. Estos simbolos se kreye ke muchiguan el poder de los ichizeros.
Los judios no aprovan la ichizeriya ma en la istoria, en munchas komunidades judiyas, aviya kreyensas i praktikas relasyonadas kon la majiya. En la Tora, la ichizeriya esta striktamente defendida i se konsidera komo una aktividad ke ofende el Dio. Por egzempio:
-No deves de deshar bivir a un ichizero. (Shemot 22/18)
-Ke no ayga en ti, ken aga ichizeriyas (Devarim 18/10)
En la Edad Media, la Kabala vino komo una forma de mistisizmo judio ke se okupa de los sekretos del universo i la kreasion. Aunke la Kabala no es majiya, munchas vezes sus praktikas se pueden konfundir kon ritos majikos, komo los uzos de los shifros divinos.
En komunidades djudiyas se uzavan kemeas kon shifros i eskrituras divinas para protejarse del ojo malo.
El Talmud diskute el tema de la ichizeriya en varias partes. Algunos rabinos kreyen ke la majiya puede tener un poder real, ma solo en los limites ke Dio permite. Otros rabinos pensan ke es solo enganyo. Se konsidera ke la ichizeriya danya la komunita. Ma ay kozas ke se uza dainda oy en diya malgrado ke se save ke es superstisyon. Komo la Hamsa o piedras blus, para protejarse del ojo malo.
Dainda en muestros diyas vemos personas ke se dizen ke pueden ayudar a los ke tienen dertes i son dezesperados, los enganyan kon kemeas falsas i aguas de yervas en vezes entosegadas. En vezes ay personas ke se dizen “sanadores” i profitan de la sensibilita relijyoza o personala de las mujeres para enganyarlas i profitan en manera seksuala o materiala.
