Fin agora vos konti unas kuantas komidas de las sivdades ke kamini en el mundo i ke me kedo la savor en el paladar, komo Tiramisu ke es spesyal de Italya, Tapas, la spesyalita de Espanya, Empanadas ke se konose en el Sud Amerika, i Gulash, la spesyalita de Ungaria.
Oy vos kero kontar sovre el Kokteyl ke bevi en la Peninsula Iberika ke se yama SANGRIA.
Sangria es un kokteyl ke se apareja kon vino kolorado, votka o rom, un poko de asukar i diferentes frutas.
Kuando mos fuimos a Espanya, a Barcelona i Madrid por primera vez, konosi la savor de la Sangriya. Despues, kuando mos fuimos a Portugal, i aya aviya en los kafes i en los restorantes esta bevyenda. Finalmente en el tur ke izimos a Andalusia, kuando vijitimos Sevilla, Granada i Malaga sin pensar dishimos al garson ke mos trayga Sangria. Me disheron ke en Sud Amerika tambiyen se beve este kokteyl.
Si keresh vos kontare komo se apareja este Kokteyl.
1 Bokal de Vino kolorado
2 Kucharas de supa de asukar
Medya portokal
Medya mansana
Medyo Limon
3-4 zirguelas pretas Anjelik
1 chibuk de kanela
medya kupa de chay de votka o rom
una kupa de gazoz
i buz
En primero se kortan las frutas en revanadas. El vino se echa en un bol grande.
Aryento de este bol se echan las dos kucharas de asukar i se karishtereya.
Despues se mete la votka o el rom i el chibuk de kanela, i enfin se echan las frutas aryentro del bol.
El bol se mete al frijider unos kuantos oras para ke se yele i se deskanse. Antes de azer el servis se mete aryento el gazoz i el buz i se traye a la meza. Si keresh, se traye kon el bol i se aze servis kon kuchara onda o si no, se mete a una kanata i se traye a la meza, para meter a las kupas. A mi me plaze muncho bever este kokteyl kon fruta freska o si no kon almendras o muez aryento del buz. Kuando lo bevesh en enverano vos arefreskash.
