El Dia enternasyonal de los Derechos Umanos se selebra en kada anyo el 10 de Desembre. Kije onorar este dia kon una kurta biografiya de René Samuel Cassin (1887 – 1976), el otor Djudio de la Deklarasyon Universal de los Derechos Umanos.
Cassin nasyo en Bayonne, Fransia el 5 de Oktubre de 1887, en una famiya Djudia sefaradi. Se engrandesyo en Nice ande estudyo en el Lycée Masséna i resivyo su diploma de bakalorea kuando teniya 17 anyos. En la Universidad de Provence estudio ekonomia polítika, istorya konstitusyonal i derecho romano i resivyo distinksiyones en derecho ke es una diploma universitariya kon distinksyon i primer premio en los egzamenes kompetitivos de la fakultad de derecho. Fue orador invitado en konferensias enternasyonales de paz. En 1914, en París, obtuvo su doktorado en siensas juridikas, ekonomiya i politika.
Cassin sirvyo en la Primera Gerra Mundial en 1916 en el Kombate de Meuse. En una operasyon militar, dirijo un atako kontra las pozisyones enemigos ma fue gravamente ferido en el braso, el bel i el estomago kon balas de mitralyoza. Un mediko le salvo la vida, ma solo diez dias despues pudo resivir un tratamyento shirurjiko en Antibes. Por sus aksyones i eroizmo en esta batalya, resivyo la medalya “Croix de Guerre”. Ma achakes de sus feridas graves no pudo tornar al servisyo aktivo i fue ovligado a retirarse komo invalido de gerra.
Poko despues de tornar a su karyera de avokato, Cassin aksepto un posto de profesor en la Universidad de Paris. Dyo konferensyas en el mundo entero, publiko dyezenas de artikulos i organizo i administro syertas aktividades en relasyon kon los veteranos de gerra diskapasitados. Cassin tambyen fue uno de los delegados de Fransya en la Sociedad de las Nasyones.
Komo Djudio fransez, durante la Segunda Gerra Mundial, Cassin era muy konsiyente de los orores del nasyonalizmo Nazi i de sus kolaboradores i spesyalmente de los abuzos de los derechos umanos. Fue uno de los primeros siviles a responder a la yamada a la rezistensya del General Charles de Gaulle i, sin peryer tyempo se fue a Londra.
Kuando el “comité central” de la Alianza Israelita Universal fue tomado debasho el kontrol de Vichy (kolaborador de los Nazis en Fransia), el general De Gaulle demando a Cassin ke deviya ayudar a esta organizasyon. Desde 1945 asta su muerte, Cassin fue el prezidente de esta organizayon Djudia muy importante.
Despues de la fin de la gerra, la primera reunion ofisyal de las Nasyones Unidas fue en Enero de 1946. Poko despues, Cassin se izo uno de los primeros myembros de la Komisyon de los Derechos Umanos de la ONU. La komisyon fue responsavle de la kreasyon i redaksyon de la Deklarasyon Universal de los Derechos Umanos, ke fue akseptada por 48 votos en favor, 0 en kontra i 8 abstensyones el 10 de Desembre de 1948. Oy en dia, esta deklarasyon es la baza de las leyes de derechos umanos ke se empleyan en el derecho internasyonal.
Fue onorado kon el Premio Nobel de la Paz en 1968 por sus kontribusyones a la defensa de los derechos umanos.
Cassin muryo en Paris en 1976 i fue enterrado en el semeteryo de Montparnasse en París. En 1987, sus restos fueron eksumados i metidos en el kripto del Panthéon de Paris.
