Todos konosemos el Rey Shelomo Ameleh i su glorioza istorya… Rey ke yamavan todos "Savyo de todos los Savyos", donde perlas le saliya de su boka. El Rey Shelomo suvyo al Trono en una edad muy chika, 13 u 14 anyos sigun los eskritos. Su Padre, el grande Rey David, lo aparejo en siendo en vida a todos los problemes del Reynado, a su misyon i mizmo a los planos del Bet Amigdash i las matieras ke se devia empleyar. Shelomo briyava por su sensya, su rikeza, sus palasyos todos era de oro, su Trono komo sus platos de komida. Karavelas i vapores le trayivan esanses raras i piedras presiozas… Los mas potentes Reyes esperavan dar sus ijas a este gloryozo Rey, donde la primera mujer fue la ija del Faraon… Korriyan de todas partes para oyer sus dichas i su saverisya. En los tekstos vemos la vizyon ke vido Shelomo, la vizyon de Gabeon ande el Dyo Santo le demandava kualo era su dezeyo, la repuesta fue "La Hohma" i Ashem le akordo kon demaziya la rikeza i una situasyon potenta … Ya savemos ke teniya munchas mujeres komo era el uzo en esta epoka… i entre eyas la Reyna de Sheba de Etiopya de oy, ke kijo oyer de su boka de este grande Rey, repuestas a sus demandas de saviduria ke enkantava a todos… La Reyna de Sheba teniya relasiones de komerso kon Shelomo ke adorava… Fue arisivida por Shelomo kon grande pompa i savemos ke fue su espoza, ke le dyo un ijo Menelik ke nasyo en Sheba i ke paresiya enteramente a su padre… Larga istorya ke asemeja a la istorya de fadas…
Agora vendremos a la razon keridos lektores, meldi en un artikolo del jurnal Keen del anyo 2012. Los arkeologos toparon a 300 metros del lugar ande se situava el primer Beth Amigdash, en kavakando, mas de 7 vazos de barro i tinajas siguro en pedasos… Enriva de uno de estos vazos los arkeologos de la universita Ebraika de Yerushalayim vieron ke aviya eskrito una inskripsyon gravada, de los diyas de Shelomo Ameleh. Enriva de esta tinaja se topa solo 7 sinyos eskritos en karakteres Kenvani eskritura ke mas tadre formo las letras Ebraikas del Ivrit primero… (Ivrit Kadum) Letras ke se empleyava en el primer Beth Amigdash. El epigrafisto, Daniel Vayshtuv kon sus bushkadas, topo ke el eskrito komportava sinyos donde el sensyo (Namesh Shehalat) Shehalat era uno de los kuatro kompozales ke son enumerados en la Tora, de esanses (Tütsü) (Shemot 30 -34) ke empleyavan los savyos del Talmud ke en sus eskritos se esta avlando i del klavo de komer (mashkar) ke se empleyava. Lo repetamos en el Bet Amigdash, Arishom ve Aseni (primer i sigundo) Templo. Vayshtuv mos dize ke este biervo es eskrito en Arabo del Sud de la Arabia, el Yemen de oy. En esta epoka el Reynado de Sheba okupava un lugar dominante. Vayshtuv mos da a entender ke la lingua Shabaneen era empleyada en la epoka del Rey Shelomo. Este kantaro i tinaja fue topada en el entorno ande se aziyan los ornos de los ke avlavan en Shabateen. El kantaro se topo en el lugar ke se aziya los echos administrativos del Rey Shelomo i de Yerushalayim. Todo esto amostra una vez mas ke kadar las relasiones komersiales i kulturales eran fuertes entre el Rey Shelomo i el Reynado de Sheba, ke situamos en el diezen siglo antes la era Kristyana (10 A.J). En esta epoka el Reynado de Sheba se developo grasias a las plantas aromatikas de toda manera. La istorya de Shelomo i la Reyna de Sheba toma lugar en el Tanah. Akodraremos ke el Rey de Sheba ke yaman Negus i sus bandyera yeva el amblemo del “Leon de Juda”. Puedemos kontinuar ansi asta los Falashas, desendyentes de Menelik, ijo de Shelomo Ameleh, savyo entre los savyos.
