Keridos Lektores,
Hanuka es una fyesta ke arrisivimos kon entuzyazmo, es la fiesta de los Makabeos, fiesta muy sinyifikativa porke mos aklara sovre la gerra de los djudios kontra los Siryanos.
Los djudios eran un grupo de sivdadinos muy chiko en akel tyempo. Keriyan bivir kon sus tradisyones i sus maneras de vida, mizmo ke
estavan amenasados. Sus mantenimyento era la agrikultura, eran modestos, se kontentavan kon poko. Al lado del reynado siryano eran proves.
Antes ventidos siglos, los siryanos aviyan okupado Israel i estavan penando para propajar la relijyon i las tradisyones gregas antiguas en esforsandosen de influensar los djudios. Munchos de los djudios empesaron a imitar los gregos antiguos, vistyendosen komo eyos, tomando nombres gregos i otros kostumbres.
El Kohen agadol, Matatia Ben Yohanan i los sinko ijos ke moravan en Modiin, i aparteniyan a la famiya de Hashmonayim se opozaron a esta situasyon, i tomaron desizyon de gerrear para pueder kedar djudios.
Despues de tres anyos de gerra, los Makabeos ganaron i el Templo sagrado ke se estava utilizando fin akel dia para las tradisyones de los gregos antiguos; paso a la mano de los djudios. Por akodrarmos de este evenemento se selebra la fiesta de Hanuka. Hanuka sinyifika avyertura porke el Templo se aviya avrido de muevo en akel tyempo.
Hanuka es la selebrasyon djudia ke illumina la fin del anyo. Esta fiesta empesa en el 25 Kislev i dura ocho dias. Hanuka es la fiesta de alegriya i de Luz. En esta fiesta asendemos los mueve kandelares.
Los Makabeos aviyan topado un bokal de azete kasher, sin tokar kuando entraron al Templo. Este azete puediya kemar solo un diya; ma akontesyo un miraklo i la azete kontinuo a kemar ocho diyas. Yeuda, ke era el ijo grande del haham Matatia, era el komandante de la armada. Le aviyan metido el nombre de “Makabi” ke sinyifikava martiyo en ebreo. La selebrasyon de la fiesta kontinua ocho diyas.
Hanuka simboliza la luz de la libertad, de la intelijensya, del entendimyento, de la djustisya i de la razon. El dover de una madre djudia es de aparejar la Hanukiya kon las kandelas kada diya, i kuando el ombre de kaza kon los ijos i ijas vyenen a kaza, se aze la orasyon en asendyendo kada uno una kandela. Despues la orasyon, se kanta todos endjuntos las kantikas de Hanuka i se kome sufganiyot i dulsuryas.
El senso de las kandelas de la Hanukiya es:
La primera kandela es el simbolo de la “LUZ”.
La sigunda kandela es el simbolo de la “TORA”.
La tresera kandela es el simbolo de la “DJUSTİSYA”.
La kuatrena kandela es el simbolo de la “PIADAD”.
La sinkena kandela es el simbolo de la “SANTETAD”.
La sejena kandela es el simbolo de la “KERENSYA”.
La syetena kandela es el simbolo de la “PASENSYA”.
La ochena kandela es el simbolo del “KORAJE”.
Vos oguro keridos lektores de aryento de mi korason, ke el Dyo mos ayege para kada anyo mijorado kon todos endjuntos a kemar las ocho kandelas, i ke la luz de la “Hanukiya” mos aklare muestros korasones, i ke mos trayga la pas en Israel i en el mundo entero. Amen.
