La semana pasada vos eskrivi sovre la mueva situasion en Siria. I dospues de una semana vemos syertas kozas ke estan trokando. En primero todos se estavan espantando de una situasion fondamentalista komo en Afganistan. Ma kreo ke este eks-militan islamisto fue mas intelijente, i por las oras no vemos kozas muy danjorozas. Kreo ke en primero va formar un governo ke va kontener los reprezentantes de todas las kolektividades i komunidades. La semana pasada mizmo syrertos ofises del governo empesaron a lavorar. Kreo ke empeso a fonksyonar sin derrokar el fonksyonamyento vyejo. Los otobuses fonksyonan en la sivdad. Antes las arabas teniyan el derecho de merkar dos vezes al mez 25 litros de benzina. Oy todos pueden merkar el karar ke keren. En syertos lugares se esta empleando la Lira Turka. Ma i esto va trokar. En Turkiya se topa milyones de Sirianos. Ken dize tres, ken dize sinko, ken dize syete milyones. I la mas grande partida son muzulmanos Sunni. Los 45 por syen vyenen de Alepo. I empesando del lunes pasado empleando tres diferentes duanas una partida estan tornando a la Siria. Ma una partida estan embiyando uno o dos miembros de la famiya para ver la situasion. Es siguro ke keren tornar a sus payizes ande nasyeron. Ma kale saver ke los 10-12 anyos dalkavo mas de 900.000 kriaturas Sirianos nasyeron en Turkiya.
Muestro payiz i muestro governo esta muy enteresado kon esta situasion. Es la semana pasada ke avrieron dospues de dodje anyos la Embasada Turka en Damasko. I nominaron un Sharje D’Afer ke va ser dospues el Ambasador en esta kapitala.
Dospues ke Esad se fuyo a la Rusia todos estan avlando de los echos mallogrados ke izo durante anyos i anyos. Siria tenia una grande produksion de petrol ma oy en diya esta kitando solo el kuarto de lo ke puede. Dizen ke formo fabrikas ande estava fabrikando drogas komo hapes de kaptagos. I estava ganando munchas paras. Estan avlando de la prizion ande oy en diya ay mas de syen mil detenidos ke no egzisten mas. Dizen ke se piedreron. No entendi kualo es la disparision de syen mil almas. Inkreivle… Esad, en indose se yevo kon el munchas tonas de oro. Fue intelijente plasando todas las paras al oro ke fue el instrumento el mas rentable.
De la otra vanda, Israel tomo una partida de las tyerras Sirianas serka del Golan. Si demandash a Netanyahu, va dizir ke es por la segurita de los Israelyanos. I vimos ke los aviones Israelyanos atakaron syenes de lugares. I kreo ke la Siria va tener una armada ma no amanyana, a la manko sinko o dyez anyos dospues.
Esto ogurando ke los Sirianos tengan un payiz en pas i la grande partida de los Sirianos ke biven en muestro payiz tornen atras. Es el dover de las Nasiones Unidas i de los payizes de la Evropa i mizmo la Turkiya de formar un fondo para ayudar los Sirianos para ke pueden fraguar kazas para el puevlo…
