Azer egzersizios es provecho i “protektor de la salud de tu meoyo” para munchos anyos. Te proteje de la demans, de depresyon i de problemes de memoria. Wendy Suzuki es una norologa i psikologa, ke mos konta sovre estos provechos kon egzemplos de su vida.
Una parte del meoyo, el prefrontal korteks, dirija para dar desizyones, konsantrasyon, azer atansiyon i muestras personalidades.
El lobo temporal. Son dos deyos i en dos partes del meoyo. Debasho ay el hipokampus. Guadra muestros rekuerdos, memoryas en munchos tiempos. Por egzemplo el primer beziko de tu amigo o el primer nasimyento de tu ijo o ija. Estos rekuerdos syempre kedan en tino durante tu vida.
La psikologa, Wendy mos konta: eya estava lavorando enriva de siensa en su laboratoryo munchas oras sin alevantarse. Kon estos lavoros paso kaji dyes anyos i empeso a tomar kilos. Remarko ansi ke no esta puedyendo azer ni un chiko movimyento. Se desido de ir a un viaje turistiko ande ivan azer rafting. Ma kuando estava lavorando en su laboratoryo, durante estos tiempos eya peryo sus amigavles. Se fue sola a este viaje. Miro a su entorno; todos ya estan puedyendo azer las aktividades, ma eya esta kedando syempre alkavo. Dio una desizyon. Para no kedar mas en alkavo de los grupos, se angajo kon un klub de spor. Izo todo los spores ke ay en el klub, komo kick boks, dans, yoga, step. En el empesijo le vino muy muy difisil ama diya en diya remarko ke esta mas fuerte, mas aktiva, mas alegre i remarko ke ya diyo los kilos demaziados sin difikultad. I ansina le vino mas muncha gana para azer spor.
Eya era una norologa, su echo era azer investigasyones. Despues ke se auzo a azer spor, remarko ke estava eskrivyendo mas fasil. Las ideas le estavan vinyendo mas libre i mas fasil. Estava mas produktiva de antes. I por esto ampeso a lavorar enriva de esto i meldar munchas kozas en la literatura. I eya ya eksperimento esta diferensia en su puerpo.
El spor produse dopamin, seratonin i noradrenalin ke son muy emportantes kimikos para mozos.
El spor ayuda a enalteser tu moral i meter orden a tu atansiyon i tu konsantrasyon por tiempo largo.
El spor influensa tus reaksiyones de no kayer, de detenerte a una koza mas presto.
Para azer spor, kale ke seyas desidido, disiplinado i kale ke pujes tu ritmo den dia al dia para ganar mas fuersas. Esta disiplina va pujar los norones de tu meoyo en primero de tu hipokampus ke va proteajar mas munchos rekuerdos. I para ke no enkontres las hazinuras dejenerativas komo demans, o Alzheimer.
No penses ke kale azer spor komo un atlet de olimpiadas. Afilu en tu sivdad si estas kaminando, kamina un poko mas. Diya en diya pujalo. Kada diya ovligate ke vas a kaminar medya ora. Ama kuidate ke no te kaygas. Siguro vas a dizir avlar es fasil, azer es difisil. Yo esto todo esto provando en mi vida. Ago pilates a la semana dos vezes i veo muncho provecho. I esto viendo en mi entorno djente aedada ke estan sanos i rezyos ke azen egzersizes afilu en kaza. Esto es investir, depozitar komo “fon de retirasyon”.
