La semana pasada tuve la okazyon de vijitar en
Istanbul Modern la egzibisyon nomada Entre Mundos de
Chiharu Shiota. Era una ekspozisyon personal, para selebrar el sentenaryo de las relasyones diplomatikas entre el Japon i la Turkiya. Se sentra en la sansasyon del artisto de estar en un lugar intermedyo.
Shiota se inspiro en azyendo esta egzibisyon, del lugar de Estambol ke se topa entre los dos kontinentes, Europa i Asia, i ke Istanbul Modern se topa en uno de los distriktos los mas okupados de la sivdad durante siglos, i ande se topa su porto istoriko, ke es en Karaköy.
Kuando instalo la egzibisyon en İstanbul Modern, Chiharu envolvyo toda la sala de la ekspozisyon en ilos kolorados i metyo las validjas aryento de esto, i mos esta mostrando el tema: de la Egzistensya en la Mankansa.
Esta uzando la kolor korolada para amostrarmos la sangre ke tenemos en las venas i la sirkulasyon de la vida; metaforikamente esta konektando las personas, las emosyones i los rekuerdos.
Kada una de las validjas esta reprezantando para Shiota una persona. Las validjas ke estan atadas unas kon las otras kon los ilos korolados estan reprezantando la kaza, la apartenensya i la identita, kreando un konteksto vizual ke aze ke los spektatores kestyonen temas tan personales komo kolektivos.
El artisto, esta adjustando kon los konseptos del tyempo, del espasyo, del movimyento i de la memorya para kompletar su ovra, esta dezeando ke el spektator se komprometa kon la ovra fizika i emosyonante.
El universo ke Shiota esta kreando kon los ilos, no solamente ofre un espasyo visualmente impressionante, es en mizmo tyempo una invitasyon para ke las personas eksploren el labirento de sus mundos interyores.
Despues de esta egzibisyon asisti a la nochada de la konferensya de Galya Molinas kon Avi Alkaş sovre el sujeto de la: Ekstansyon de la Vida Umana.
Miraremos de una perspektiva de una mujer i de un ombre.
Galia tomo la palavra en avlando sovre el problem del impakto sosyal. “Ande se esta indo la populasyon? Los ke tyenen mas de 60 anyos, son la mas grande partida de la populasyon mondial. Las etapas de la vida evolusyonaron.
Oy, el tyempo de bivir de los ombres en la vida es 78 anyos, i de las mujeres es 83 anyos”.
“Avi tomo la palavra en dizyendo ke despues los 65 anyos es la edad de oro para las personas. Devemos de aferrarmos a la vida. Nesesitamos mijorear muestra vida kon chikas abitudes. La mueva jenerasyon tyene diferentes abitudes. Las jenerasyones diferentes estan lavorando endjuntos. Los mansevos no estan puedyendo dirijar ni suportar los aedados, muy difisil. Entonses las jenerasyones diferentes deven de entendersen entre eyos en lavorando en el mizmo lugar”. Avi se esta okupando de los lugares espasyozos.
“Para pueder egzistir en la vida su buto es de ir a los kazales i konstruir kazalikos chikos de 400 kazas, un mundo diferente. Pasar de la vida de las sivdades a la vida rural. Las personas deverian de tokar a las otras personas en komunikandosen.
1- Ken da el poder produktivo?
El poder del dirijente i el talento.
2- Por la vitalita: La famiya es muy emportante, i la salud fizika kon la sensualidad. Los hobis, los amigos presyozos son rejenerativos.
3- El poder transformativo es en jeneral el poder ke no reushimos.
La persona deve de demandarse kestyones a si mizmo komo:
Kualo so yo, kualo kero azer, ande me kero ir? Muy difisil. Los puntos en los ke somos los mas flakos. La eksperyensya i ambezarse es muy importante.
Lo ke es importante por la persona es la felisita. Oyir la boz de su korason, kale pasar a un stilo de una vida mueva.
Si no puedes azer lo ke amas, entonses estaras mas feliz kon el echo ke azes. Kale adaptarse a una vida mueva para pueder mirar pozitivamente a la vida.
Kale bivir el momento mizmo. Deshar ir el pasado. No pensar al futuro.
Devemos de engrandeser i elevar muestras kriyaturas i inyetos. Es importante de unir las 3 jenerasyones.
No ay limito de edad para ambezar kozas muevas. Todos pueden ser entreprenores.
Ay munchas oportunidades. Ser voluntaryo es importante.
El meoyo derecho i syedra lavoran endjuntos kon armoniya. Esto es el estado superyor del nivel intelektual.
