Embiyado por: Izzet Bana
Lo ke teniya era ainda sesh
anyos.
Me akodro ke la kandelika chika de sevo, ke mi padre asendyo la primera noche
de Hanuka, me aviya plazido muncho.
Delantre de esta kandelika estuve aparado i mirando su luz ke se iva meneando i
no me aleshi de eya ni un punto.
En vano me estuvo avlando mi madre para ke deshe i koma por la noche.
Ma yo no me kije espartirme.
En una banketika bashika estava asentado mi nono serka de mi.
Me aserki a el i le dishe, "Papu kontame un kuento!"
El me afishugo mis kaveyos i empeso, "Estas viendo mi chiko esta kandelika
chika? Saves tu ke esta es la alma de un chikitiko?"
"La alma de un chikitiko?"
"Si mi kerido. I sovre este ijiko es ke te kero kontarte.
La koza afito antes munchos anyos.
Kuando muestros padres estavan en sus tyerras,
Se alevanto sovre eyos un enimigo fuerte, ke eran los yevanim.
Eyos destruyeron sivdades i moradas i mataron a sus moradores sin piyadad.
I fue la tyerra muy dezolada.
En una sivdad, kedo un ijiko guerfano porke a sus paryentes los mataron.
Salyo el ijiko al kampo i esklamo, 'Nuestro Dio en los sielos! Mira lo ke izyeron los
enimigos krueles. A mis paryentes degoyaron, a todos de la sivdad mataron. I tu estas
kayado?'
Akeya ora, abasho de los syelos un Malah, kon sus alas blankas i de sus ojos koryendo
lagrimas de fuego. Este era el Malah Mihael, ke es el andjelo de Yisrael, toko kon sus
alas en la frente de el ijiko i lo transformo en una kandelika."
"En una kandelika?"
"Si. Ma no una kandelika komo otras, sino ke esta tiene en eya la alma de el ijiko
djudyo ke demando salvasyon por su puevlo.
Un esprito espesyal teniya el: de trayer las senteyas aryento los korasones i
Asender en eyos el fuego de la kerensya del puevlo i de la tyerra.
Iva kaminando el Malah, i la kandelika maravioza asendiya fuego de amor en los
korasones de los pokos barraganes ke avian kedado.
I ansi se alevantaron estos sovre sus enimigos i los vensyeron
i los rondjaron de la tyerra."
"La kandelika chika, dainda kema?"
"Si mi kerido. En los korasones de munchos de muestro puevlo, dainda kema.
Porke entre en eyos egziste la alma del ijiko djudyo,
ke demando salvasyon para su puevlo."
