Devemos de empesar kon la Siria. Reelmente es muy emportante la situasion aktual. Ya savemos ke Israel okupo tierras de la Siria para su seguridad. I esto no se esta valorizando positivamente por los otros payizes. Porke la grande majorita de los estados no keren la divizion del estado Siriano. I ay syertos ke avlan ke kon esto todo la Turkia i el Estado Israelyano pueden vinir frente kon frente. Espero ke este no es una koza ke se puede realizar. El segundo problem es el problem de los Kurdes ke biven en una parte de la Siria. I esto esta un problem para la Turkiya. De la otra vanda vemos ke solo unos kuantos miles de Sirianos tornaron a sus payiz de orijin. Kada diya en los haberes estan avlando de miliones i de miliones de Sirianos ke biven en muestro payiz. En Kilis, sivdad serka de la Siria el presyo de alkilar una kaza abasho de vente mil a kinze mil, i de kinze mil a dyes mil. En este sivdad se topavan mas Sirianos ke Turkos. Kreo ke la normalizasion de este kavzo va turar a lo manko unos kuantos anyos. I espero ke este kavzo no va krear la mankura de lavorantes en las fabrikas. Bivir i ver.
Ya savesh ke tenemos una ekspozision de Ketubas Otomanas i Turkas en muestro muzeo. I la semana pasada demandi a Nisya, direktrisa del muzeo ke eskriva a todos los muzeos de la Evropa para ke mos empresten Ketubas Otomanas/Turkas si tyenen en sus koleksiyones. Es solo el famozo koleksyonaryo Israelyano William L. Gross ke mos embiyo las fotos de las Ketubas Otomanas i Turkas ke tyene; i mos embiyo las de Salonik. En esta ekspozision no tomimos las Ketubas gregas mizmo si syertas partidas eran parte del Imperio Otomano una larga epoka.
Entre las sesh Ketubas ke adjustimos a la ekspozision, una era de Diyarbakır
(anyos de la Republika Turka-1928); una de Kuzguncuk ke era una ija de la Famiya de Camondo. Una ketuba ke les yakisheo. Una otra de Estanbol ma ke fue empleada en Adapazarı; i una otra de İzmit, sivdad serka de Estanbol.
Tenesh la posibilidad de vijitar esta ekspozision en muestro Muzeo Djudio asta el 20 del mez de Febrero 2025.
Ketuba de la famiya Camondo
