Ekspertos de la endustria de muzika se estan reuniendo para apoyar el dokumental “We Will Dance Again” ke gane un Oskar. Este dokumental esta amostrando el orror ke Hamas izo a los mansevos en el Festival Enternasional de Muzika Nova de Israel en el 7 de oktobre de 2023.
Kon la kolaborasion de los kanales de muzika, los produktores estan ekspresando sus apoyo por el dokumental. El dokumental "We Will Dance Again” fue publikado en la platforma BBC Storyville en Ingleterra i en Hot Channel 8 de Israel. El dokumental de 90 minutos, eskrito i dirijido por Yariv Mozer i produsido por Michal Weits de HSCC, esta prezente en Paramount en los Estados Unidos. Uvo una demonstrasion del filmo en el estudio de Paramount Picture por los envitados. Un sovrebiviente del atako terrorista de Hamas, partisipo en una meza redonda despues de la projeksion.
Mas de 360 personas murieron, i munchas mas fueron eridas kuando los terroristos avrieron fuego kontra "el festival al aire libre" en Re'im, en el sur de Israel.
Penn, ke produizo el dokumental de 2023 "Superpower" sovre la gerra en Ukrania, avlo en favor de "We Will Dance Again". "Estamos empleyando el termino filmo ke kale ser visto, ma munchas vezes los filmos no estan uydeando a este termino. Muy triste i muy eksplikador, 'We Will Dance Again' es reelmente un filmo ke kale ser visto en muestro tiempo", disho Penn.
Nevins aksentuo ke un dokumental komo "We Will Dance Again" es el instrumento apropriado para apanyar los eventos ke afektan al mundo i tambien ayudar a fonksyonar kon el trauma. La kamara lo apanyo todo. “Este briyante dokumental se eleva ensima de toda la vulgaridad de la inumanidad de Hamas para gritar ‘Vamos a baylar de muevo’, disho Nevins.
El filmo esta rekonstruyendo el salvaje atako kon imajes de video de diferentes orijines, inkluzo material inkreivlemente aturvador, publikado por terroristos de Hamas. La gerra ke esta kontinuando en Gaza kreo una kriza umanitaria global ke desho mas de 44.000 palestinianos muertos. Kaje1.200 israelianos murieron en el atako del 7 de oktobre i 63 personas de los 251 rehenes tomados por Hamas el 7 de oktobre, dainda estan kaptivas.
Zirinsky, produktor de CBS News, aksentuo ke el fokus del filmo esta enriva los adultos mansevos. Sus vidas fueron despedasadas akel dia. “Este filmo esta trayendo delantre muestros ojos los eventos ke se realizaron akel dia i es por esto ke munchos de los mijores narradores de istorias de Hollywood ekspresaron sus agradesimiento por kitar en medyo esta trajediya, i onorar los rekuerdos de las munchas vidas perdidas”, disho Zirinsky.
