Alper Almelek
Yo kreo ke meldar ovras de teatro es muy importante para avrir la imajinasyón i mirar la vida de otros angulos. Las personas preferiyan ver las ovras en teatro, no meldarlas en sus kaza.
Si bushkamos la definisión de 'ovra de teatro' en Wikipedia, puedemos topar lo sigiente: 'Una ovra es una representasión o interpretasión kompuesta de diálogos i deskripsiones entre personajes, ke normalmente se eskrive para ser reprezentada i no para ser meldada.'
¡No es una grande surpriz!
Mi padre, ke era dramaturgo, se murió en agosto de 2023, i despues de su muerte, empesí a meldar una ovra kada día. Asta oy, meldí 196 autores de todo el mundo, i 79 ovras (49 autores) kedaron mis favoritas.
Kuando meldas una ovra, tu imajinasyón empesa a lavorar i puedes verte a ti mizmo komo un direktor filmando tu propio filmo. Metes dekorasyones, kreas los personajes, la atmósfera de los temas ke okurren en la ovra, engleneandote muy muncho en el proseso.
También penso ke al eskrivir tu propia ovra, la eksperiensia es la máksima ekspresión de plazer ke puedes bivir kon todo tu meoyo i tu alma. Mi padre eskrivió varias ovras i me akodro ke estava muy satisfecho kon eyas.
Agora kero avlarvos de una ovra muy famoza en el mundo del teatro. Su autor es amerikano i su nombre es Tennessee Williams (1911-1983). Aki tenesh una chika informasión de Wikipedia sovre él:
'Fue un dramaturgo amerikano eksepsional. Ganó el Premio Pulitzer de Drama en 1948 por 'Un Tramvay Yamado Dezeo' i en 1955 por 'La Gata sovre el Tejado de Zinc Caliente'. Los krítikos afirman ke Williams eskrivió en el stilo gótiko. Es konosido mundialmente porke munchas de sus ovras fueron yevadas al sine.'
Komo pueden ver en esta informasión, la ovra de la ke kero avlar es 'UN TRAMVAY YAMADO DEZEO'. Esta ovra es maraviyoza porke trata de la psikolojía umana, las diferensias de klasa sosial, las ermozuras i difikultades del matrimonio, las karakterístikas de bivir en kazales chikos, las diferensias entre ombres i mujeres i los dezavantajes de los dedikodus.
Puede ser ke entre los lektores hay algunos interesados en esta ovra, así que no kero dar demaziada informasión, ma si me permeten, les kontaré un poko sovre el drama.
Tenemos un kupl kazado, Stanley Kowalski i su mujer, Stella Kowalski, ke biven en Nueva Orleans, ke en esta époka no era una sivdad grande. Un día, Blanche yega apasis a su kaza i kere kedarse kon eyos por un largo tiempo. De los diálogos, vemos ke Blanche tiene problemes psikolójikos i munchas difikultades en su vida. Vemos tambien las tensiones entre eya i Stanley, i sus diskusiones frekuentes.
Komo dishe antes, rekomendo muncho a todos los lektores ke melden esta ovra, porke kontiene eksplikasiones maraviyozas ke mos ensenyan a ver la vida desde munchas perspektivas diferentes relasionadas kon la psikolojía umana.
