Una noche de Avril, 1955 Albert Einstein se estava keshando de una dolor de tripa muy fuerte. Dingun kalmante no le aprovecho, a la fin se fueron al ospital Princeton. Einstein ya sufriyiya de muncho tiempo de dolores de tripa i el Dr. Rudolf Nissen lo aviya kurado en 1948. Aya lo egzaminaron bueno bueno i desidaron de operarlo. Ma Einstein refuzo kategorikamente. El disho ke kere murirse naturalmente, kuando kere el. Ya le abasta lo ke bivio, no kale mas muncho forsar la natura. Sovre esto lo metyeron en una kamareta kon una enfirmiera a su lado ke teniya kudyo de el. Einstein se yevo kon el al ospital los papeles ande estava eskriviendo su diskorso para un program en la televizyon sovre la komemorasyon del sieten aniversario del estado de Israel, ma no bivio bastante para kompletarlo.
En supito ampeso Einstein a avlar a la enfirmiera. Ma el estava avlando en aleman i la enfirmiera komo era amerikana no estava entendiendo ni un biervo de lo ke diziya el. Despues ke avlo unas kuantas palavras en aleman, Einstein mos desho la buena vida. Ansina fue ke dingunos no supieron lo ke disho al final.
Despues ke muryo Einstein, el mediko patologo del ospital, Dr. Thomas Stolz Harvey, ampeso a azer la otopsiya kon sus elevos endjuntos. Kuando arivaron a la parte de la tripa, toparon ke aviya muncha sangre arekojida. Entendieron ke era una emorajiya enterna kavzada por una ruptura del anevrizma del aorto abdominal.
Ampesaron a serrar el puerpo, el Dr. Harvey disho a sus elevos de salir de la kamareta de otopsiya. El kijo saver ke forma de meoyo puediya tener Einstein. Le avriyo el krano, le kito el meoyo i en sekreto lo yevo a su kaza, sin tomar permisyon de la famiya.
En el laboratoryo de su kaza, metyo el meoyo en un pezo i vido ke el meoyo de Einstein era mas livyano de un meoyo de una persona normal. Despues, korto el meoyo en revanadas i despues en kuartikos i no topo nada de ekstraordinaryo. Solo la parte del pensamiento matematiko estava mas developado de lo normal. Kuando la famiya de Einstein se apersivyo ke mankava un pedaso, empeso un proseso. El Dr. Stolz mando los pedasos del meoyo a munchos sientifikos para ke lo egzaminen.
El puerpo de Einstein fue kemado en Trenton, New Jersey i sus sinizas fueron echadas a un lugar sekreto.
En una konferensia komemorativa a su nombre el 13 Desiembre 1965 en el UNESCO, el fiziko nuklear J. Robert Openheimer avlo de su empresyon sovre Einstein, i disho: Siempre aviya en el una maraviyoza pureza, en vezes infantil i era muy kaprichozo.
Einstein desho por erensya, su arshivo personal, su biblioteka i sus bienes entelektualas, a la Universita Ebrea de Yerushalayim, en Israel.
