Komo empeso, i komo se esta eskapando, sin entenderlo, ya vinimos al kavo del anyo, ya estamos en fin de Disembre. Kaji kedo 10 dias para el Anyo Muevo, ma estos 10 dias son komo un festival para mozotros, lo ke pasimos en el anyo, los problemes, las hazinuras, las keshas sin kestyonar, todo lo echamos a un kanton.
I en estos 10 diyas empesa un viyaje de esperansa, en realidad no es la esperansa para mozotros, la grande fuersa por muestra vida? I mozotros estamos azyendo lo mezmo estos 10 dias, estamos bivyendo yeno yeno kon la esperansa.
El festival empesa la noche de 21 Desembre, porke es la noche la mas larga, i empesa la luz a prevaler en muestra vida, porke luz es syempre esperansa.
La noche ke konekta el 24 Desembre al 25 Desembre es Noel de los Kristyanos, es el nasimyento de Jesus, su kumpleanyos. Se aze orasyones en el mundo entero para pas, para amistad, i para esperansa.
La noche de 25 Desemre es la fiesta de los Djudyos, es la fiesta de las luzes, ke es
Hanuka, el festival de la luzes es una estorya muy ondo, ande se realizo un nes, kuando tomaron atras el Bet Amikdash. Para empesar la orasyon kaliya azer de muevo una restorasyon, ma malorozamente no aviya luz, teniyan solo un poko de azete i un kandil, i kon esta poka azete lo asyenderon el kandil ke sin amatarse kemo de si para si 8 dias i se realizo un nes. I mozotros en Hanuka asendemos estas kandelas 8 diyas i arogamos al Dio syempre ke no mos manke la luz de la vida, de la famiya, de las kazas, kon pas, kon sanedad, i kon amistad.
I la noche de 31 Desembre es la ultima noche del anyo en el kalendaryo utilizado en el mundo, i arogamos al Dio ke el anyo muevo ke venga kon sanedad, kon esperansa, kon pas, i kon mantenimyento bueno.
Kon lo bueno, i lo negro pasimos un anyo, la ermozura es ke en estos 10 dias estamos aferrandomos a los dias futuros, i para amanyana kon esperansa.
I estamos dizyendo para la noche de 21 Desembre bienvenido dias klaros, para la noche 24 Desembre Feliz Navidad, i para la noche de 25 Desembre Hanuka Alegre, la luz ke no mos manke. I a la fin, la noche de 31 Desembre estamos todos gritando, ANYADA BUENA KON SANEDAD i KON PAS, VEN KOMO BENADAM!
