Para mozotros Rosh Ashana es el empesijo del anyo muevo ebraiko. Kada anyo selebramos esta fiesta kon grande entuzyasmo. Ma komo no estamos bivyendo en las tierras santas; en Israel no vemos selebrasyones en las kayes. Vemos solo las aktividades de los Djudios en las kayes, en los kuarteres ke biven los djuydios en muestra sivdad.
Esto eskrivyendo este artikolo un anyo antes ; en el anyo 2024. Ma lo vash a meldar un anyo dospues , en el 2025. Unos kuantos diyas antes del fin del anyo salimos en las kayes de Nışantaşı kon mi mujer para ver komo dekoraron las kayes para el anyo muevo. Reelmente lo dekoraron simple ma muy ermozo. I todos los Istanbullis i los turistos ; la mas grande partida turistos arabos estan en las kayes tomando fotos. La dekorasion en la Plasa Abdi İpekçi fue realisada para ke la djente toman fotografias. Kada mayor de Şişli no son tan hovarda para gastar tantas paras. Ma esta vez se dize ke no gasto paras de la kasha i es kreo los magazenes ke ayudaron la munisipalidad para ke realisa esto todo. En las fotos vash a ver lo ke realisaron.
Kada anyo pensamos si devemos salir afuera el diya dalkavo del anyo o no. Kon los presyon de los dos anyos dalkavo , salir en esta noche es una lokjura . Devesh de gastar a lo manko 200 dolares. I un alay de difikultades. No puedesh salir kon la araba , porke tornando a kaza si sosh detenidos por la polisia tenesh el riziko de pyedrer el permeso (ehliyet). I de pagar una pena (ceza) bastante alta I es dospues una desgrasia, en primero no tenesh el derecho de emplear una araba. I si tenesh el echo leshos este es una desgrasia. I esto es un tyempo de sesh mezes. Dospues no es siguro ke va ser una nochada reushida. Ma mizmo kon estas kondisiones todos los lokales estan yenos , kon sus presyos egzajerados.
No konti esto todo para topar una razon para mozotros . Reelmente ay munchos anyos ke no estamos saliendo noche de presipyo de anyo (yılbaşı). Ma este anyo syertos amigos organisaron una selebrasion en un restoran de las islas ke se topan en la mar de Marmara serka de Estanbol. I muestros amigos alkilaron una araba para ke no empleamos muestras arabas. I mos vamos irmos al vapor kon esta araba alkilada. I vamos a tornar a kaza kon esta araba.
Por el puevlo i las personas el anyo muevo es muy emportante , por los ke lavoran, la mueva mezada ke van a tomar. No saven si van a ser kontentes o no. Este anyo kon la enflasyon ke bivimos en el payis ,el minimum paga aumento ke de 30 por syen. I kreo ke todas las mesadas van a pujar de 30 por syen. Kreo ke dingunos van a ser kontententes de esta pujitad; ni los ke lavoran , ni los patrones.
Por las kompanias komersiales, la fin de anyo es una data muy emportante, porke dan karar i topan el resultado de un anyo entero. Lo ke realiso la firma en un anyo. Si gano o no ! I todas estas kompanyias azen muevos procektos para el anyo venidero.
Mizmo el Sentro Sefaradi esta azyendo muevos procektos por el anyo 2025 agora i no en R Devo de atorgar ke no azemos muevos procektos en Rosh Ashana. No se de ke ma el anyo muevo kristiano es una data mas emportante, mizmo para las fondasiones i asosiasones djudias en muestro payis.
Kero eskapar mi artikolo vos augurando una anyada buena kon salud buena i munchas paras ke vash a ganar.
