Pueden los judios aprovecharsen de la oportunidad para azer rezolusiones de Anyo Muevo para el anyo sekular? O es prohibido? El 1 de enero no es lo mezmo ke Rosh Ashana i Yom Kipur; el Anyo Muevo judio es una fiesta relijioza, mientras ke el Anyo Muevo sekular es una selebrasion alegre. Ma tambien puedemos aprovechar del anyo ke eskapo, pedir dezeos i azer rezolusiones por el anyo muevo.
"No ay nada de negro por el judio, de divertirse i sosializarse la noche de Disembre 31. Espesialmente por los ke biven en la diaspora, es importante de respektar sus amigos i klientes non-judios. Ademas, la idea de mirar atras, i pensar sovre los eventos del anyo pasado es una idea judia”.
“Por algunos judios, la idea de selebrar el Anyo Muevo en el 31 de Disembre los aze sintirsen inkomodos. Para eyos, este dia aze parte de la tradision sekular, i no reflekta la tradision judia. Pensan ke partisipar a esta noche es una traision a la tradision judia”.
“Deke estos judios supsonan tanto este dia ke el mundo entero esta selebrando? Deke semos tan obsesionados kon muestra propria singularidad? Deke no estamos viendo muestra koneksion kon el mundo entero? Si muestro objektivo es ser diferente, no vale la pena”.
“Ay ideas judiyas ke puedemos unir a esta okazion para azerla mas sinyifikativa”.
“El Anyo Muevo marka un momento ke la djente en todas las partes del mundo selebran, i lo ven komo una posibilidad de konstruir un mijor futuro. Este diya semboliza el dezeyo de la persona de apartar el pasado del futuro, lo viejo de lo muevo. La persona pensa ke tiene el poder de ayudar a krear un mijor futuro. Tenemos el dezeyo de pueder empesar de muevo, i de no ser emprizonado en el pasado. Tenemos esperansa por muevas posibilidades en muestro futuro”.
“Estas son tambien ideas ‘judias’. Deke no inkorporar un poko de judaizmo en las rezolusiones del Anyo Muevo?”
“La tradision judia selebra la kapasidad de la persona de kerer empesar de muevo durante el anyo entero. En la vida judiya, todos los diyas, todas las semanas, i en todas las okaziones, tenemos la oportunidad de empesar de muevo”.
“Kada Shabat mos akodramos del primer momento de la kreasion, i mos damos la oportunidad de empesar de muevo. Azer teshuva, i empesar de muevo es muy importante en el judaizmo. Tomar rezolusiones para transformar muestra vida es lo ke aze el judio en kada orasion”.
“Seyga en Roshashana o en el 31 de Desembre, tomaremos buenas desiziones para el futuro, rogaremos al Dio ke mos de sanedad, pas, i diyas alegres. El 31 Disembre, lo veremos komo una otra okazion para tomar rezolusiones a transformar muestra vida por lo mijor”.
