Ya se ke pensa komo un Israelyano de la vanda de Netanyahu ma no lo topo ni serka de la demokrasia, ni muy objektivo. Esto avlando sovre Donald Trump. Puedeser ke tyene razon de no resivir mas muevos imigrantes. Ma devemos de ver la diferensia entre diferentes imigrantes. Un diya avia un program en la television franseza TV5. I estavan diskutiendo ke todos los ke vinieron a la Fransia illegalmente en los anyos 40 i 50 se izieron los intellektuales de la Fransia en los anyos 60 i 70. Una grande partida de estos imigrantes eran djudios ke vinieron de diferentes payizes. Todos los imigrantes no son mizmos. Ay en jeneral una grande diferensya entre un grupo de Sirianos, i un grupo de Meksikanos.
Es diya de fin de anyo ke uvo unas kuantas eksplozyones en diferentes lugares en los Estados Unidos. Syertas arabas entraron ariento de la djentorya i mataron a muncha djente. Mizmo 2 Israelyanos en New Orleans. Se dize ke en los Estados Unidos se topa mas muncho armas legales ke la populasion Amerikana. I estas fos almas fueron askeres en la armada Amerikana!!! Vos djuro ke no me plazia mizmo en el askerlik de emplear armas. No se deke ma no me plaze… Ize el askerlik en la izla de Kibris; i era ofisier de reserva. Kada diya lavorava i devia de azer antrenamyentos. (en los anyos 1980-81) kon 150 soldados. Kuando Trump va empesar su epoka, puedesh estar siguros ke van a vender mas muncha armas. La venidera vez ke me va ir a los Estados Unidos kreo ke va tener a lo manko dos armas. I puedeser una para mi mujer!!!
Kreo ke vamos a ver diferentes kozas kon el prezidente Trump. Ya se ke una grande partida de los Djudios i de los Israelyanos estan muy kontentes de esta situasion. Ma una partida no estan kontents.
I ay munchos trokamyentos en muestro payiz, la Turkiya. Kon el problem de los Kurdes ay reelmente problemes muy emportantes. Kon la Siria no savemos el komporto del muevo governo Siriano.
Ma de una vanda el Governo Turko kere pardonar el famozo Apo, ma la opozision esta kontra esta idea.
De una vanda los Kurdes, de la otra vanda las muevas mezadas para los lavorantes, para los ke lavoran i para los emeklis. Para los emeklis esta reelmente una desgrasia.
I vemos ke las muevas mezadas no estan altas kon la enflasyon ke tenemos en el payiz.
Tengo de kontar munchas kozas, ma es bastante para esta semana.
