Fin agora vos konti unas kuantos komidas i koktelyles ke komimos i bevimos kuando estavamos viyajando. Agora vos kero kontar sovre las salatas ke komi en el mundo, En Italya, Caesar i Panzanella, en Marocco Zaaluk, en Brasil, Salpicao, en Malezya Kerabu, en la Gresya salata Grega, en Antakya la salata de los Libanezes, el Tabule i en Gaziantep, la salata Gavurdağı etc. Esta semana empesare kon la salata ke komimos en Fransya, Salad Nisuaz.
Esta salata es spesyal de la sivdad de Nice. Por esto se yama Salad Nisuaz. Komo todas las salatas, el material spesyal es la salata vedre, domat i pipino i pipirushkas.
Al lado de estos materyales se puede meter diferentes kozas komo patatas, guevos, diferentes pishkados salados, karota, kol, ravanikos, kezo blanko, i en vezes trigo o arroz o sino, lentejas, ets. Mozotros antes komiyamos la salata al lado de las komidas i se diziya ke es el aksesuar de la komida. Ma oy en diya en el mundo se esta komyendo la salata komo antre, para empesar. El sujeto de oy ke es la salata Nisuaz, vos kontare komo se apareja esta salata.
Materyales
4-5 ojas de lichua
1 kuti de Tuna
4 Patatas eskaldadas i kortadas en 4
3-4 domates de cherry
4-5 fasulyas eskaldadas i kortadaz komo sherit
1 chika sevoya korolada
1 guevo haminado
2 anchuez saladas
4-5 azetunas pretas si es sin kueshko es mas ermozo
Para la sos
2 kucharaz de supa de azete
1 kuchara de vinagre
1 diente de ajo
Sal
Pimyenta preta
Komo se apareja:
En un chini ondo se meten las lichuas kortadas en 4 kon las manos, ensima la sevoya ke se korto komo piyaz, ensima los sherites de fasulya, el guevo ke se partio en 4, el pishkado Tuna, las domates, las patatas, i las azetunas, en fin se mete las anchues ke se kortaron en dos. De la otra parte, la sos ke se aparejo se karishtereya i se echa ensima de la salata. Antes de komer inchivos una kupa de vino blanko bien yelada ke va muy bueno kon esta salata Franseza.
