En los sinemas esta djugando un filmo ke se yama “Maria”. Los artistos son Angelina Jolie i Haluk Bilginer. Angelina Jolie djuga el rolo de Maria Callas, la famoza soprano, la Diva, ke teniya una boz ke paresiya ke viniya de los sielos. I Haluk Bilginer djuga el rolo del famozo rikinyon armator grego, Aristoteles Onasis.
No es ke vide el filmo dainda. Ma me entereso muncho i va ir a verlo. Porke era una istoria de amor grande de mi manseves. No aviya diya ke no se avlava de eyos.
Onasis nasio en Izmir, Karatash. Despues del fuego salieron de Izmir i se fueron a la Gresia. En 1946 se kazo kon Athina Livanos. Malgrado ke era kazado tuvo un grande amor kon Maria Callas. Maria era muy muy godra. En un anyo se aflako muy muncho. Eya tanbien era kazada kon Meneghini; en estando kazada, se ennamoro de Onasis, ampesaron a bivir endjuntos. Onasis le aziya regalos muy presiozos. Diamantes, samaras, kazas i tambien un yacht. Para akel tiempo, este amor era un skandalo muy grande.
Ensupito Onasis se alesho de Maria i se kazo kon Jacqueline Kennedy, ke era la mujer del Prezidente de los Estados Unidos de la Amerika, John Kennedy. El fue matado.
Despues ke Onasis se kazo kon Jacqueline, Maria tuvo una tristeza muy profunda ke avagar avagar le toko a la salud i se muryo en 1977, kuando teniya 54 anyos. La siniza de Maria fue enterrada en el simeteryo de Pere Lachaise en Paris. Esta siniza fue arovada. Kuando se topo, esta siniza fue echada a la Mar Egeo, sigun su dezeo.
Vendremos a Onasis. En 1973 su uniko ijo, Alexander paso un aksidente de avion i se muryo. La salud de Onasis ampeso a degradar. I se muryo en 1975, a 69 anyos. Kuando muryo teniya mas de 500 milyones de Dolares Amerikanos.
La famiya Onasis era una famiya maloroza. Onasis tuvo un ijo Alexander i una ija Christina. El ijo se muryo en un aksidente de avion. A la ija a 37 anyos la toparon muerta i no se supo de kualo. Disheron ke se mato, disheron ke tomo drogas. El kompozitor espanyol, Joaquin Sabina le dediko una kantika ke se yama “Pobre Christina”. Christina tuvo una ijika ke se yamava Athina Onasis. Esta ijika se kedo guerfana kuando era muy chika. Agora ya es una manseva muy muy rika. Es la sola eredera de Onasis. Es una buena jokey. Tiene kavayos de rasa pura ke son muy presiozos.
Vos ize una perspektiva de la Famiya Onasis. Veremos kuando me va ir al filmo, si va topar todo lo ke se saviya sovre eyos.
