Ya savemos ke en una semana el 20 Enero 2025, el prezidente Trump va tomar su posto. Mizmo si ay mezes ke esta avlando i dizyendo kozas ke no son muy akseptables, el fuego de Los Angeles fue un muevo problem para el empesijo de su prezidensia. Los Angeles, la sivdad la mas rika del mundo, no es bien dirijada porke los dirijentes de esta sivdad achetaron ke no tyenen bastante personas ke lavoran en el servisio de amatar fuegos i de kombater kontra el fuego. Esto no es akseptavle. Para el payiz el mas riko del mundo, ke ayuda a munchos payizes dandoles milyardas de armas i de bombas, no es kapache de topar personas para ke lavoren en el itfaye… Oy tyenen una grande partida de Los Angeles ke se kemo. Fin agora ay mas de 10.000 kazas ke se kemaron kompletamente. Dizen ke los ke tyenen segurita van a tomar las paras i van azer de muevo sus kazas. Es djusto ke se avla ke buen karar de firmas de seguridad van a fayitar. I dizen ke el ayre va ser mas fuerte en los dias ke vienen. I mizmo puede trokar de direksion. Un grande malor. El prezidente Biden deshando su posto va deshar un regalo no muy famozo al Prezidente Trump.
Trump antes ke empese su mision demando a los Palestinianos de deshar liberos todos los prizonieros israelyanos. No ay dainda dinguna repuesta. Demando a los de Kanada ke sean una provinsya de los Estados Unidos. Es siguro ke no le dyeron repuesta. Durante su primera prezidensia, Trump keria ke Gronland sea tyerra Amerikana. Ma ni el Danemark, patron de estas tyerras no kere esto, ni los ke biven en Gronland. Se dize ke es un teritoryo muy riko en minas. Ma el komo una kriatura esta demandando i demandando. Los Estados Unidos va a tener problemes kon el Meksiko tambien porke Trump no kere mas imigrantes illegal.
I komo el Meksiko es el payiz el mas importante para esta imigrasion, Trump kere fraguar una pared en el bodre de Meksiko, entre los Estados Unidos i Meksiko.
I lo ke kere azer para ke la ekonomia Amerikana sea mas poderosa. No kere los Chinezos. Reelmente el mundo entero va bivir grandes problemes kon la administrasion de Trump. Ya savemos ke kuando no gano 4 anyos antes, embiyo un alay de bandidos a la direksion del payiz. Reelmente es un ombre muy danjorozo por los Estados Unidos i para el mundo entero.
Espero ke vamos a ver kozas buenas kon Trump, i no vamos a bushkar el vyejo Biden.
