Esta demanyana de 14 de Enero 2025, mos alevantimos kon un haber muy negro para muestra komunidad. Malorozamente, muestro kerido Rav Isak Haleva mos desho la buena vida, un haber ke firyo muestros korasones. Ya saviyamos ke estava hazino ma no saviyamos ke su situasion estava tan serioza. Por esto, todos tuvimos un shok en sintiendo este haber.
Rav Isak Haleva fue parte de muestras vidas por largos anyos, un ombre ke todos amavan porke era un ombre bueno, savyo, simpatiko, siempre kon la kara riyente i siempre mostrando afeksion a todos ke konosiya. Nunka mankava de bendizir los ke viniyan a avlar kon el, los ke le demandavan konsejo, i siempre augurava kozas buenas a la komunidad, al paiz i al mundo entero. Paz entre las personas i en el mundo era lo ke dezeava lo mas.
Muestra peryita es komo si peryimos a muestro padre i por esto mos sintimos komo guerfanos. Ke su alma repoze en Ganeden!
