Kuando era chika me iva a la Mahazike Tora en el kal Apolon ke agora es un pasaj de vendedores de lampas.
Mis profesores eran, amore NİSİM BEHAR i su mujer Madam Suzan. Eran muy duros, mos gritavan i en una chika koza mos travavan la oreja ma atorgare ke me ambezi munchas kozas de eyos i entrenaron munchos raves ke konosko oy en diya.
Dospues, en el edifisyo del gran rabinato, los diyas de martes en orden de Raves, empesi de muevo a irme a estas lisyones. Los ensenyantes eran, Rav Adoni, Rav Peres, Rav Alalu i su eminensya Rav Haleva, este en ganeden.
Mos kontavan la istorya djudiya, kon grande pasensya, mos davan repuestas a las demandas.
Esto muy sigura ke la siensya de la psikolojiya tomo munchos egzempyos de la Tora. Un grupo de mujeres ke no mos konosiyamos mos izimos amigas komo ermanas, tanto tomava plazer, para mi los diyas de martes eran sakros.
Todos los Raves muy presyozos, uno mas savido de otro ma kuando era el torno de su Eminensya Rav İzak Haleva, era otro, en kontando mos aziya riyir, akel diya mos pasava por teatro. Kreyo ke si no se aziya Rav se puediya azer un komedyen alavado. Syempre teniya uzo de eskapar la lisyon kon una konsejika talmudik u byen kon una anekdota. Una de eyas ke me kedo en tino la va partajar, No se si la va pueder kontar tan savrozo komo el.
“En el tiempo ke Shelomo Ameleh era rey, unas kuantas mujeres se revoltaron para bushkar sus derechos, salieron a su prezensya i le demandaron:
---- Rey de los reyes, El ke es tan djusto, El ke da la razon al ke lo merese, kómo permete ke los ombres ke tomen kuatro mujeres i mozos las mujeres solo un ombre? Esto es una grande indjustisya! Le rogamos de topar un remedio.
El rey Shelomo es verda ke era muy djusto ma en mezmo tiempo era muy entelijente. Penso penso i les respondio:
---- Keridas mujeres! Tenesh muncha razon ma este sujeto es muy emportante, yo no puedo tomar desizyon sin demandar al Todo Poderozo.
El rey de vista dyo orden a su moso ke le trayga un papel, un kalem i un pashariko, eskrivyo la demanda de las mujeres al papeliko, lo ato al pye del pashariko i les disho:
---- Keridas mujeres! Ya eskrivi vuestra demanda a este papeliko, agora este pashariko lo va azer bolar a los sielos, tené pasensya, kuando me va vinir la repuesta del Dyo Santo ya vos va mandar a yamar.
I es de akel tiempo fina oy en dia, las mujeres kuando ven un pashariko apozar en la ventana empesan a dizir:
--- HABERES BUENOS! HABERES BUENOS!
KE SU ALMA REPOZE EN GANEDEN.
