Estamos muy tristes de la piedrita de muestro bien amado Gran Rabino el Rav İsak Haleva. Komo ya meldimos en todas las alavasyones ke eskrivyeron, el Rav era una persona muy presyoza kon muncha saviduria i era un ombre muy simpatiko. Tenemos grande pena de su mankura.
Yo vos kero kontar dos memoryas ke tengo kon el.
En el kal de Göktürk, aviya una seremoniya ke no me akodro oy, si era una fiesta de Purim o el diya ke trusheron las Sefer Toras, para la seremoniya de la aviertura. Todos estavamos muy alegres, kantes i palmas. Estava i el Gran Rabino. La komunita de Göktürk tiene muncha manseves. Los kuples mansevos i siguro munchas kriyaturas chikas. Los ijikos/ijikas koryendo por aki por aya, gritando i riyendo durante las orasyones. Los padres no estavan kontentes de esto, estavan inyervandosen i los estavan ovligando a asentarsen a sus lados. En un antrakto, suvio Rav Haleva a la teva i disho. “Deshá ke koryan i griten i ke se engleneyen los ijikos. Eyos no pueden asentarsen oras enteras koma mozotros. Si se enfasyan, no van a kerer vinir mas. Eyos son muestros futuros. Kale motivarlos i no alesharlos. Por esto deshaldos ke koryan i riygan”. Ke buen konsejo.
Un diya, antes munchos anyos, aviya vinido la famoza kantadera Flory Jagoda a Estambol. Todos estavamos asperando ke ampese el konser. Entro i el Gran Rabino Haleva, el salon entero se alevanto en su onor. En entrando estava kon su kara de riza de siempre, saludando a los del salon. Mozotros estavamos al empesijo de una sira, mos vido i le tomo la mano de mi marido i le disho: “Pasha, de ves en kuando ven a la botika!”. Mi marido no se va muncho al kal, malgrado ke es buen judio. El Rav Haleva ya remarko i lo konosyo. Aryento de tanta persona, tanto judio, komo le kedo en tino ke mi marido no se va muncho al kal. Una persona formidavle.
Estos dos evenimientos nunka no los va olvidar.
Ke su alma repoze en Gan Eden.
