Estamos muy tristes de peryer a muestro Maestro, ke era una fuente de luz i saverisyo para mozotros.
Empeso a este dover onorable en el anyo 2002 i fina oy dyo un grande esforso para protejar la identidad djudiya. No solo era amado por muestra komunidad, ma en el mundo entero era konosido kon sus kalidades umanas. Kon su personalidad modesta, su riza kayente i su grande korason, gano el amor i el respekto de todos.
Dava una grande emportansa a los chikos i a los mansevos, a sus edukasyones, porke el era profesor i ensenyava en la fakulta de teolojiya en Estambol.
En la sinagoga de Burgaz kuando mi marido,
Meir Gaon (z.l.) era el gabay, le diziya:
“Kerido Meir, dize a tus amigos ke traygan a sus inyetos i inyetas las noches de shabat al kal. Mizmo si azen bruido no es emportante, ke respiren el aver de la sinagoga. Eyos son las estreyikas, el avenir de muestra komunidad”. Veramente kuando viniyan i djugavan en basho, le aziya tanto plazer ke a la salida distribuava bonbones a los chikos. Todos tresalidos siguramente.
Era un lider relijyozo ke arrekojiya a todos kon su avla i kon su riza dulse.
Rav Ishak Haleva dediko su vida a mirar las kozas de manera pozitiva. La karakteristika la mas grande del rav, era el amor ke teniya por la Turkiya.
El era uno de mozotros, ombre del puevlo, un maestro, un ofisyal del Bet-Din, ombre savyo, persona umilda ke tyene una istorya kon todos, tolerante, sensero, ambasador de la umanidad i de la paz.
Me esto akodrando, un dia de enverano en Burgaz, a las ocho de la demanyana, indo a Kalpazankaya, me rankontri kon el en el kamino. Estava solo, las manos de detras, una kasketa en la kavesa, kuando me vido me dyo un saludo kalorozo i yo le demandi:
Estimado ribi ande se esta indo tan temprano?
La repuesta fue:
“Hanuma miya, kije tomar un poko de aver solo, sin una
persona ke me proteje, porke no me estan deshando tomar reflo. Syempre estan al lado de mi, paso kon paso. Eyos keren protejarme ma no ay menester.
Los Mallahim i los Andjelos estan al lado de mi. Dingunos no me pueden azer nada, porke el Dyo poderozo esta al lado de mi”.
Teniya una grande konviksyon al Dyo. El era el simbolo de Burgaz. Todos lo keriyan muncho byen.
Kualo es la muerte? La muerte es, la fin de las aktividades vitales de una persona. Todos somos mortales, pasajeros. Ma, no esto pudyendo dijerar la peryita del muestro kerido rabino.
El aktivo, kapache, padre akorrido de sus ijos, marido perfekto de su mujer, ermano sensero, amado por sus inyetos i inyetas, i munchas otras kalidades.
Era el apoyo moral de su famiya, el simbolo de la amista, tolerensya, gano el korason de todos.
Una de sus kalidades es, ke su komporto fue syempre kon entuisyon, igual a todos.
El rav Isak Haleva, aliado de toda la komunidad, ke ambezo komo se ayuda a una persona sin ofender su orgolyo, persona de ken se puede tomar konsejos, pozitivo, buen profesor, intelijente, modesto, yeno de kerensya.
Kerido Rav. Isak Haleva ke tu alma repoze en gan-eden i ke tu kamino seyga alumbrado de luzes komo alumbrates el muestro.
