La semanada pasada indome al echo diya de martes a las dyes de la demanyana me ambezi ke muestro Hahambashi, Rav İsak Haleva mos desho la buena vida. Ya savia ke tenia syertos problemes de salud; mizmo syertos dirijentes de la komunidad tuvimos una seduta ande tuvimos una diskusion sovre lo ke devemos de azer si afita una koza ke no dezeamos al Hahambashi. En estas diskusiones no fue sujeto ke el Hahambashi mos puede deshar la vida en unos kuantos diyas. Este diya el Hahambashi estava saliendo del ospital para ir a su kaza. I es martes dospues de midi ke tuvimos una Reunion en el Hahambashılık para dar karar lo ke se deve de azer durante estos dos diyas antes de la Seremoniya de Funerales. La Seremoniya fue realizada en la Sinagoga de Neve Şalom. El Estado fue representado por el Ministro de la Kultura i del Turizmo, el sinyor Mehmet Nuri Ersoy. El Governador de Estanbol, el Sinyor Davut Gül, el Prezidente de la Munisipalidad de las Izlas, el Sinyor Ercan Akpolat, i el eks-ministro de las Relasiones Evropeas, el Sinyor Egemen Bağış partisiparon a la seremoniya. El patrik Grego Bartholomeos, el Patrik Ermeni Sahag Mashalyan, el Patrik de los Surianis Ortodokses, Yusuf Çetin partisiparon a la seremoniya tambien. No me akodro de los nombres de todos los partisipantes ma las komunidades kristianas asistyeron kon mas de 25 personas. Durante la Seremonia todos los Rabis partisiparon i meldaron un teilim. Ekseptado del minitro del Turizmo; el Rav İsak Alaluf al nombre de los Rabinos del Bet-Din; El Prezidente İshak İbrahimzadeh al nombre de la Komunidad Djudia de Estanbol; i el Rav Nafi Haleva, ijo del Hahambashi avlo al nombre de la famiya Haleva. La segunda parte de la seremonia fue realizada en el Simiteryo Sefaradi de Ulus. I aya una djentorya estava pronta para la segunda parte de la seremoniya. Todo modo de arabas, de minibuses i de otobuses transportaron la djente de la Sinagoga de Neve Şalom asta el Simiteryo. Kale achetar ke los dirijentes de muestra Komunidad organizaron kon grande reushidad una seremonia tan emportante. Ya se ke esta semana el Şalom esta achetando artikolos sovre el Gran Rabino Rav Haleva. Tuve la posibilidad de lavorar kon el empesando del primer diya de su dover. I demandi la semana pasada a Ivo Molinas ke me aspere antes de embiyar el Şalom a la Kaza de Imprimeria. I eskrivi mi artikolo. I esta semana mi artikolo en Djudezmo tiene komo sujeto el Hahambashi Haleva i lo ke afita en Israel kon los Palestinianos.
Oy diya de Alhad ay kuatro oras ke mi mujer esta kon la komputadora para segir la television Israeliana, ya konose el Ebreo porke estudyo en la Univerrsitad de Tel Aviv. I estamos kon la televizyon Turka i Israelyana. Yeno de emosion, mizmo si syertos Israelyanos pensan ke no es djusto de azer este trokamyento, penso ke es muy menesterozo de dar estos asasinos, mizmo si no es djusto para todos, i de salvar las almas ke estuvyeron sufriyendo los kinze mezes dalkavo. Oy, el primer diya ke va empesar la PAS, malorozamente Israel mato otras 19 almas Palestinianas profitando del retardo ke uvo. En este primer diya tres mansevas ke tyenen 24, 28 i 31 anyos fueron liberadas. Mirando las fotos de ke estavan i de lo ke son oy en diya kreo ke no es muy fasil de pueder konoser estas tres mansevas. Ma a la fin fueron liberadas i 90 palestinianos van a topar la libertad en Gazza. Espero ke todos los esklavos israelyanos van a topar sus libertad en poko tyempo.
