Me esto akodrando kuando mos fuimos a Las Vegas arivimos al otel un poko tadre porke en salyendo del avion kaji era la 6:00. Mos tomo el gia i pishin mos kito al tur de la sivdad. Por esto no tuvimos muncho tiempo de komer por la noche. Kuando arivimos al otel ke se yamava Golden Nugget, ya era las 10:00 de la noche. Deshimos las chantas a la kamareta i abashimos al lobi. El otel era muy grande; imajinavos teniya 2 Resepsiones. Una delantre i otra por atras ke se entra al otel. Siguramente este karar de grande otel teniya aryento Casino, botikas, i restorantes diferentes. Teniyamos muncha ambre; por esto dishimos esta noche komeremos en el otel porke ya esta muy tadre i estamos kansados i bien ambyertos. Mos asentimos para komer en el restorante del otel. Kijimos komer peshkado porke unas kuantas oras despues mos ivamos echar. Komimos en primero una supa de domat i una salata Sezar. Fin akel tiempo no konosiyamos esta salata. Mos plazyo tanto ke le demandimos al garson komo se apareja esta salata.
Mos empeso a kontarmos la estorya komo salyo esta salata. El shef italyano Cesar Cardini estava bivyendo en Kaliforniya. En los anyos 1920 se fue a Meksiko, a la sivdad Tijuana, i avryo aya una lokanta. Kijo azer una salata diferente; penso i topo esta resefta de la salata. I desde akel diya esta salata se yama kon el nombre del shef Cesar.
Los materyales ke se mete aryento son:
½ Lechua partida kon las manos. No se korta kon kuchiyo.
2-3 revanadas delgadas de kezo parmesan
10 panizikos kortados chikos i tostados en el orno kon ajo i azete
3 anchuez
1/4 la parte blanko de la gayna kortada Julyen
1 guevo haminado
2-3 domates cheri
Por la sos
2 kucharas de supa de mayonez
1 kuchara de dulse de mustarda dijon
1 diente de ajo
1 kuchara de chay de sal
½ Limon
1 kuchara de supa de sos de Worcestershire
Para aparejar:
Las Lichuas se parten kon las manos i se meten aryento de un chini ondo
Ensima se mete la gayna ke se korto julyen, si no keresh gayna, puedesh meter anchues
El guevo partido en 4
Los krutones
Las tomates partidas a medyas
I la sos ke se aparejo i se karishtireyo aryento de una kacharola se vazya ensima de la salata. Al lado de un makaron al orno i un vaziko de vino blanko se kome muy ermozo esta salata.
