El filmo ‘A Real Pain’ resivio kuatro nominasiones en la ochentisigunda edision de los Premios Globo de Oro, ande Kieran Culkin (Bensi en el filmo) gano el premio del Mijor Aktor de Reparto.
El filmo eskrito i dirijado por Jesse Eisenberg, esta kontando la istoria de dos primos David i Bensi ke eran muy entimes en la chikes ma ke son muy diferentes agora. David i Bensi estan viajando a Polonya duspues de la muerte de sus nona. Los dos primos keren ver ande biviya sus nona antes La Segunda Gerra Mondial, antes ke se fuyeran a los Estados Unidos. La nona era una sovrebiviente del Olokosto.
David i Bensi keren tambien ver komo el Olokosto influenso la rejion. Se eskriven a un grupo ke esta vijitando Polonya, eksplorando los lugares ande los judios bivian. Ay una tristeza de vijitar la tierra natal, de ande sus djente eran, i saver ke no kedo dinguna trasa ayi.
Los dos primos se estan akodrando de las rizas, de los momentos ermozos, i de los momentos no konfortavles de sus chikes. El filmo esta tambien demandando la kestion "Ke es la famiya kuando los nonos i las nonas se mueren?"
En el filmo, la komedia i la trauma estan manejadas una kon la otra. Eisenberg esta eksplorando tambien el amor problematiko i nostaljiko ke los primos estan sintiendo el uno por el otro.
Eisenberg proviene de una famiya judia sekular de Polonya. Durante vente anyos, kombatio para responder a la kestion de komo puede unir las difikultades de su vida moderna kon la trauma istorika de sus antepasados viktimas o sovrebivientes del Olokosto.
Kuando empeso a eskrivir A Real Pain en 2022, ke empeso komo un eksperimento mental, Eisenberg bushko a meter en el filmo dos primos modernos i diferentes ke estan kombatando kon "diferentes grados de dolor", komo la anksiedad i la depresion, de los orores de la Segunda Gerra Mondial.
En el filmo, Eisenberg estuvo eksplorando estos temas kon kestiones ke keria responder. El grupo, a la fin del viaje, arivan al kampo de konsentrasion de Madjanek. En este punto, las palavras no sierven a nada. El lugar avla por si solo.
Kuando eramos chikos, mos ambezimos sovre la istoria judia i las atrosidades del Olokosto. Mos paresiya ke era un pasado no muy leshos. Puede ser ke era antes kuarenta anyos, agora se izo setenta i sinko anyos. El tiempo kura todas las feridas. Ma si las feridas no sanan, i se transforman a feridas ke pasan de jenerasion en jenerasion?
A Real Pain es sovre este tema. Una trauma ke gano mas muncho fuersa en los anyos dalkavo: una trauma jenerasional. Los kampos pueden ser una parte santral de la eksperiensa judia ma no kontienen todo. Los judios estan familiarizados kon el ekzilo por munchos anyos. Todos konosemos el klishe ‘el judio erante’. Todos keremos enkontrar un lugar ke vamos a yamar ‘mi kaza’, ma una parte de muestra alma va kedar en el egzilo porke keremos estar al lado de los ke amamos, i esto va ser bastante para mozotros.
