La istorya Judiya es yena de egzemplios i alavasiones a las mujeres ke tomaron lugar importante en el seno de muestro puevlo. La Biblia da un tablo presiozo de munchas mujeres en diferentes epokas, kon sus aktos de bravura i saveduriya.
En la istorya moderna i aktual vemos siertas mujeres a la kavesa de postos altos i seriozos, munchas Deboras antiguas i modernas. Oy avlaremos de Damme Asenath Mizrahi, donde el nombre no es muy konosido ma ke es de una grande valor intelektual i moral, i tuvo un lugar importante en la komunidad de Musul. En el mundo Judyo, las mujeres lavoravan para ke sus maridos estudyen la Tora. Mos akodraremos de las palavras de Rabi Akiva: “Kere bien al otro koma ti mizmo, tu mujer mas ke ti”. Damma Asenath Mizrahi 1590- 1670. Esta mujer eksepsional nasyo en Musul, en Kurdistan. Unika kriyatura, fue engrandesida por su padre el konosido, el grande Kabalisto i poeta SAMUEL Ben NATANEL Ha-LEVI BARAZANI. En una letra adresada a la komunidad Judiya de Amadiya, Asenath avla de su chikez i de su manseves. "Yo era la sola kriyatura de la famiya i fui edukada por los grandes savyos de la epoka, komo una ija de reyna. Yo era la glorya de mi padre". Asenath mos konta ke estudyava noche i diya, su instruksyon es tan alta ke eya toma el lugar de su padre komo ensenyante. Profitando de su mueva libertad, el Rabi Natanel puede okuparse de los echos de la komunidad.
En el kontrato de kazamyento kon su primo, Yakob Mizrahi, el padre de Asenath metyo komo kondisyon primera, ke su ija no sera nunka ovligada de echos de kaza, para ke pueda okuparse de sus estudyos i ambezar a otros su saverisya. El marido de Asenath kontinuo briyamente la misyon de su esfuegro, a la kavesa de Amadiya. Asenath toma en mano la karga administrativa para ke su marido pueda darse al estudyo de la Tora. Kuando Yakob desparesyo, Asenath se topa kon un ijo i una ija i a la kavesa de una Akademiya, i kon pokas paras. En sus letras eskritas kon un Ebreo poetiko, Asenath roga a la komunidad Judiya de Amadiya, de ayudarle kon las devdas de la Akademiya porke la otoridad metyo la mano enriva. Asenath parviene a reglar la mas grande parte de los bienes, i todos los problemes i supo mantener en pies la Akademiya, asta ke su ijo eskape sus estudyos i ayude a su madre.
Asenath era una savya de literatura Judiya i tambien de la Kabala. Eskrivyo un livro de dichas i proverbos Judyos, i korespondyo kon otras komunidades Judiyas. En 1664 el Eminente Rabi Kabalisto Kurdo, Pinehas Harari le adreso una letra de alavasyon, en terminos ke jeneralmente se eskrive i se nombra a los mas eminentes, Rubisa Donna Asenath komo la nombravan todos kon respekto.
Todos los savyos se esparesyeron en 1670 en Musul deshando un rekuerdo de valor inestimavle para todos.
