Anya Gold era la mas grande ija de ocho ermanos i en 1930 su padre i madre polakos la embiyaron a Baltimore a la proteksion de una tiya karinyoza.
Aviyan avansado bastantes paras para un bilyeto. Mas duspues todos se ivan a unirsen en Baltimore. Anya aspero ke su famiya venga ma su famiya no vinyeron, aviyan kayido en las manos de Hitler.
Duspues de la gerra, Anya se ambezo el destino de su famiya. Unos pokos sovrebiventes de su sivdad natal en Polonya ke vinyeron a Baltimore le disheron ke su famiya entera fueron eksterminados. El rekuerdo de su famiya kedo en su meoyo, en su korason i en su alma.
Anya se kazo kon un ombre, Sol, i se desido a tener ijos ke ivan a tener los nombres de sus ermanos. Ma, no pudieron tener ijos. Empesaron a bushkar la ayuda de los spesialistos ma no toparon remedio.
Un dia Anya le demando a su marido si keriya adoptar una kreatura. Anya aviya konsiderado esta opsion por muncho tiempo. No estava pudyendo imajinar ke iva sintir lo mizmo por una kreatura adoptada. “Si, adoptaremos una kreatura’’ le disho su marido. Se fueron a New York i se adresaron a una ajensiya judiya. Le propozaron un bebe ke les plazyo muncho ma mas duspues se ambezaron ke un pariente se aviya desidado a engrandeser la kreatura. Fue una deziluzion por Anya.
La fonksionaria de la ajensiya les disho, “Tengo una ijika maraviyoza ke se yama Miriam ma tiene ocho anyos’’. “Yo kero una kreatura ke seyga muy chika para ke me konoska komo su madre”, le respondyo Anya. “Kero un muevo nasido para kunarlo en mis brasos’’. “Miriam paso negros diyas en su kurta vida, i tiene menester de una kaza amoroza” disho la fonksionaria.
Paso un anyo, Anya estuvo en kontakto kon munchas ajensiyas, ma no pudieron topar un bebe. A la fin, se desidaron a adoptar a Miriam. Miriam era una kreatura muy atraktiva. “Su ermano chiko fue enkontrado en Evropa i lo trusheron a muestra ajensiya ke es para los guerfanos de gerra. No puedemes separar a los ermanos. Konsiderash adoptar a los dos?’’ les demando la fonksionaria. Anya i su marido akseptaron a adoptar a los dos ermanos. Moshe teniya sesh anyos. Moshe era un poko timido ma Miriam era aventurera i kurioza.
Kuando vinieron a kaza Miriam se detuvo enfrente del piano. Amostrandoles la fotografiya de enriva del piano, les demando: "Ke bushka la fotografiya de mi nona aki?’’ Anya se enkanto. Miriam kito de su bolsa la mezma foto, i una otra foto. La amostro a Anya. "I esta es la foto de mi madre’’ le disho. “Sarah!”, grito Anya. ‘’De ande saves el nombre de mi madre?’’ le demando Miriam.
Sin saverlo, Anya aviya adoptado a las dos kreaturas guerfanos de su ermana muerta Sarah. Eran karne de su karne, sangre de su sangre. Eran... los suyos.
