El sinken Livro de la Tora es yeno de konsejos i leyes sovre la gerra, jeneralmente kon todos los detalyos i otras leyes ke son todas dadas por Moshe Rabenu a los ijos de Israel ke estan todos para entrar a la tierra de Kenaan. Estos konsejos son valables por diyas i son una linya de kondukta fasta oy. En estos diyas de Shevet serkando de Tu-Bishvat, mos akodramos ke esta fyesta no es de komer frutikas loores al Sinyor del mundo, es una regla de guadrar la natura i los arvoles.
Tu -Bishvat es uno de los kuatro muevos anyos de muestro kalendaryo Ebraiko.
(Tu Bishvat, anyo de Arvoles) (Primo de Nisan, anyo de Reyes i Festivales) (Primo Elul, anyo de impuestos "vergi” enriva de las Bestias) (Rosh Ashana, anyo muevo Primo Tishri).
El Devarim mos dize (Si estas asiejando una sivdad, no abates los arvoles, kada arvole es presiozo, es un elemento bivo ke te mantyene de su fruta. Puedes kortar el arvole solo para azer tavlas i fraguar la mueva sivdad. El Deteronom mos avla de otras Leyes, komo eskojer un Kohen Agadol ke va konsejar a los kombatantes de la gerra, para las mujeres sekuestradas, una regla partikular. Se da el permeso de kortar los kaveyos, dar tyempo de yorar su padre i madre, de kualos va estar espartida para syempre.Todo esto antes de apartener a su patron. Leyes de la natura: destruir la natura es destruir a si mizmo. Tu -Bishvat es fyesta de la natura i mos mostra el kamino de la vida. Guadrar la erensya a los ijos. Mos akodraremos de los primeros balutsim (Pioneros) ke de un dizyerto izyeron una tierra de leche i miel. Komeremos en la noche de Tu-Bishvat los frutos de Erets Israel. Tu-Bishvat alegre para todos.
