En eskrivendo las salatas ke komimos en viyajando en el mundo, me esta vinyendo a los ojos las sivdades ke kaminimos. De una parte me esto alegrando de akodrar los paizes, de la otra parte me esta vinyendo las savores a la boka en akodrandome. Oy vos kero kontar la salata ke komimos en Marocco en Marakesh. La salata se yama Zaaluk. Esta salata en vezes komen komo mezelik, en vezes aryento de un sandvich i tambiyen al lado de las komidas komo salata. Una noche kuando mos fuimos a un restorante ke se yama Chez Ali, en primero mos dieron komidas spesyales de Marroco i despues empeso el Show Tradisyonal para konoser la sivdad i a la djente de Marroco. En primero vino a la meza unos kuantos mezelikes i salatas. Despues la komida spesyal i tradisyonal, el Tajin. La salata Zaaluk estava muy savroza. Paresiya komo el mezelik ke se yama Shakshuha o komo el mezelik ke komimos en Antakya ke se yama Babagannush. Tanto mos plazyo ke le demandi al garson komo se aze esta salata Zaaluk. Me konto tambiyen a todos ke son Marrocanos les plaze esta salata. Las demanyanas en el dezayuno aun se kome me disho. En kada kaza se topa. En vezes las demanyanas, en vezes kuando tornan los ijos de la eskola ke estan ambiyertos i las noches al lado de la komida, se mete a la meza disho. En kontando el garson, mozotros estavamos komyendo komo mos amostro kon las manos. Kon tres dedos tomando la pita i metyendo aryento de la pita la salata. Esta salata se kome yelada o si vos gusta, kayente. Mas muncho se prefera komer tivya. A mozotros vino a la meza tivya i mos konto kualo ay aryento de esta salata i komo se apareja.
Los Materyales
1 Berenjena grande kortada en kubos
3 Domates kortadas en kubos
2 dientes de ajo
1/3 de prishil i kishnish
1 kuchara de dulse paprika
1 kuchara de dulse kimyon
1 kupa de chay de azete de oliva
1/3 de kupa de agua
Sal
El Aparejar
La berenjena se asa ensima del orno. Despues se munda la kashkara i se mete aryento de una kacharola kon las domates ke se mundaron las kashkaras i se kitaron los mijos i los materyales ke eskrivimos ariva. Se desha a kozer. Kale karishtereyar en vezes para ke no se keme. Kon un piron se dezaze los materyales ke estan aryento de la kacharola i se desha a apurar avagar avagar. Si keresh, puedesh komer yelado komo salata o si keresh, puedesh komer tivyo, komo mezelik.
El mas famozo viyaje ke izimos me akodro era a Marroco. Porke konosimos diferentes djented, paiz i kultura. Gostimos muy enteresantes savores en kaminando en las kayes de Marakesh.
