Kada semana mizmo dos vezes, estamos yenos de emosion sigiendo el trokamyento de los rehenes israelyanos kontra los kondenados palestinianos en Gazza i Israel. Inkreivle; 60 kondenados palestinianos kontra un rehen israelyano. Kada vida salvada no es una istoria, es un romanso. Reelmente no es muy kolay; dospues de mas de 470 diyas, personas ke topan sus libertad. Kreo ke kada uno tyene muncho de kontar. Esta semana dos vezes bivimos este evenimyento. Espero ke de las dos vandas no se van a repentirsen i se van a ir fina la fin para liberar toda esta djente.
Kon el muevo prezidente de los Estados Unidos, el Sinyor Trump, reelmente vamos a bivir munchas trajedias. Empeso a dizir ke no kere los Palestinianos en Gazza. Ke se vayan a Ejipto o a Jordania. Ni los Palestinianos keren esto, ni estos dos payizes. Es diya de Shabat ke los dirijentes de estos dos payizes kon los reprezentantes de la Arabia, del Katar i los Arabos Unidos izyeron una seduta para refuzar la propozisyon del prezidente Trump. Es djusto ke los Estados Unidos ayuda al Ejipto i la Jordania finansyalmente. Ke afita si no achetan? Normalmente Trump va dizir ke no les va ayudar. I ke va afitar? No savemos. Reelmente kon su prezidensya esta kreendo un alay de problemes. Vamos a bivir esto durante los kuatro anyos de su prezidensya. Va ser una epoka bastante problematika kon el prezidente Trump. Bivir i ver.
Dainda estanos durmyendo en pyes i el livro de las ketubas no esta dainda pronto. Es esta semana ke vamos a lavorar para realizar el livro. No es solo este livro. Tenemos otros 4 livros ke estan prontos i ke devemos de publikar. Tenemos un echo bastante seriozo.
Esta semana devo de eskrivir una letra a la kompanyia ke da premios a los livros de komidas. Resivio un premio el livro sovre las komidas Djudias de Edirne. Esta vez vamos a presentar el livro sovre las komidas de Çanakkale. Vamos a ver el rezultado. Si resivimos un premio, kreo ke Berta va ser muy kontente.
Estanbol es una sivdad ande se realiza kada diya konsertos i manifestasyones komo teatros, operas i bales. Es muy enteresante; organisaron el Balet Bejart solo una noche. I en dos diyas eskaparon los bilyetos i una segunda noche. I esto se eskapo en poko tyempo. Agora estan organizando una tresera noche. Los presyos son entre 700 liras (20 usd) i 2500 liras (70 usd). No se si es karo o no ma en Estanbol se topa mushteris para todo. Es la semana pasada ke mos fuimos a un teatro en Zorlu. Era la noche dalkavo. Ma kon sus presyos bastante karos, el salon estava kompletamente yeno. En esta sivdad para kada aktividad ay personas ke se enteresan…
