Engrandesidos kon muncho bueno en una famiya grande de Tokat, los ermanos Mizrahi kedaron guerfanos. En estos anyos, en Evropa avia La Primera Gerra Mundial. Los revenidos de la famiya se estavan aminguando i empesaron a tener problemes i mankura de paras.
Mi gramama ke era de la famiya Kampeas de Estanbol, despues ke kedo bivda, desidio de deshar Tokat, i vinir a Estanbol para ke los chikos estudien. Mi tia Elza, la grande de la famiya, a penas termino el lise, empeso a lavorar komo sekretera en la Banka Otomana. Komo avlava muy bien el Fransez, despues del echo dava lesiones de Fransez a elevos. Un dia la madre de un elevo le disho “tengo un primo en Nimes, Fransia ke se kere kazar kon una de Turkia, te enteresa”? Mi tia aksepto, se embiaron fotos i se desidieron de kazar. Kon su madre, tomo el vapor de Estambol i abasharon en Marseilles.
Se instalaron en Nimes i empesaron a lavorar en la butika de konfeksion de la parte de su espozo. Kedo prenyada i le nasio un ijo i despues de 7 anyos kedo de muevo prenyada i le nasio una ija en 1943. Los Nazis avian okupado el Norte de la Fransia, ma eyos en el Sud, estavan en la zona libre. Ma a la fin del anyo 1942, la partida del Sud fue okupada por los Alemanes i los Italianos. Elza, su marido, su ijo i su bebe se fueron a eskonder en un kazal, ande unos amigos ke tenian una kaza kon un bodrum.
Esta famiya Taragano de mi tia, bivio en este bodrum asta la fin de la gerra. Mi tio Izak Taragano, marido de Elza, estava metido al lado de la radio para segir las novelas. Despues de bivir dos anyos en el bodrum de sus amigos fransezes, el oyo ke en fin, La Fransia esta liberada de los Alemanes. Kon guste grande salio del bodrum del kazal ke bivian i se fue direktamente a la gara de treno para ver lo ke se esta pasando. Mirando kon kuriozidad i guste, estava viendo ke los Alemanes estavan inchendo los trenos para tornar a sus paizes, la Alemania. Un Fransez ke entendio ke mi tio es Judio, le disho a los Almanes, “toma este judio i metelo al treno”. Un ofisial aleman, antes ke el treno se alevante lo tomo kon fuerza i el treno salio de la stasion. Despues de asperar dos anyos para la liberasion, mi tio no tuvo la shans de gostarla. Malgrado todos los esfuersos de la famiya, malorozamente fue un dezaparesimiento total.
El anyo pasado, despues de 80 anyos de la salvasion del Sud de la Fransia, en el 27 i 28 aug 2024, en Marseilles izieron dos dias de komemorasion para akodrarsen de este momento istoriko.
