Keridos Lektores,
Esto kontinuando a las perashas del livro de
“Moris Levi”, ke las auno kon unas istoryas apropriadas a estas perashas.
KEDOSHIM: Albert Einstein en el anyo 1922, eskrivyo una nota simple a un asistente de un otel ke no tomo un bahshish; ke se vendyo en el anyo 2017 en Yerushalayim, en una anshere a 1.56 milyon dolares ande estava eskrito:
Una vida trankila i umilde, traye mas felisidad ke una vida de syempre inkyetud i bushkida de la reushidad.
BAMIDBAR: Le demandaron al poeta “Can Yücel” una lista de sus bienes. Immediatamente eskrivyo i embiyo:
NASO: Va konstruir una kaza grande i alta kon munchas kamaretas en el sentro de la sivdad, kon un techo de teneke. Ke tyene aryento una eskalera larga para suvir solamente arriva, i otruna eskalera larga para abashar abasho
i otruna ke no se va a dingun lugar, solo para mostra.
Va inchir mi guerta kon los poyikos, kon los patos i kon las palazas, para ke la sivdad vea i oyga. Kon la boz alta un grito de “uak uak” ke venga al oyido komo una boz de trompeta, komo si dishera: “Aki bive un ombre riko”.
BEAALOTEHA: El rey de Fransiya prometyo a Cesar Borgia una novya muy manseva i ermoza komo regalo de su fidelidad.
Borgia kuando vido la novya se gusto muncho.
La ija del rey de Navarro, Charlotte de Albret, ke era reelmente muy atraktiva.
La noche de la boda, Cesare Borgia desido de tomar un afrodisiako. De la emosyon el mesklo los kutis de kuras i, en lugar de tomar afrodisiako bevyo muncho laksatif.
No pudo salir de la tualet para irse a la kama. Sufriyo kon frekuensya de la dolor abdominal ke sintyo esta noche, durante todo su kazamyento.
SHELAH LEHA: Aze muncha atansyon a lo ke vash a avlar, se konvierte a los pensamyentos.
Aze muncha atansyon a los pensamyentos, se konvierte a las emosyones.
Aze muncha atansyon a las emosyones, se konvierten a los komportamyentos.
Aze muncha atansyon a los komportamyentos, se konvierten a las abitudes.
Aze muncha atansyon a las abitudes, se konvierten a las valores.
Aze muncha atansyon a las valores, se konvierten a tu personaje.
Aze muncha atansyon a tu personaje, se konvierte a tu destino.
KORAH: Kualo es protokolo?
En la Roma Antigua, los primeros rangos de las arenas estavan reservadas para personas de rango alto.
Komo se alevantan tambyen en pyes kuando se entuziazman en las manifestasyones, los sivdadinos de atras solo puediyan ver los popos godros de los de delantre, durante los momentos los mas emosyonantes.
Por esta razon, “Proto” ke sinyifika (de delantre) i “Colles” ke signifika (kulo) salyo esta definisyon, ke kere dizir:
Protokol: los popos de delantre.
Los ke estan en el protokol, de vez en kuando se revoltan a esta definisyon.
