esfuegra nasyo en Salonik. Kuando era chika, su padre se aviya echo el shefe de la gar de trenos de Dedeağaç. Akel tiempo en Salonik i Dedeağaç, i todo el entorno era yeno de judios. La gar de treno era de dos kates. En el kat de abasho era el buro, el gishe de bilyetos i una sala para ke asperen el treno los viyajadores. El kat de ariva era el lojman del shefe. Aya morava el shefe kon su famiya. Yani el shefe, su mujer i sus kriyaturas. Mi esfuegra teniya tres ermanos. Kero dizir ke esta gar estava en medyo de un kampo, leshos de las kazas, no era muy povlado.
Una noche, despues ke ya se echaron a durmir, ya estava kaje 3-4 de la noche, se espertaron kon un bruido. Alguno estava chafteyando la puerta del lojman. Una vez, dos vezes… mas i mas afuerte. Atyo ken esta chafteyando la puerta ansina tan fuerte. Se espantaron muncho. La noche estava areskuro zifir. No se viya nada. De sorte ke no estavan puedyendo yamar ayuda. A la fin el padre de mi esfuegra tomo su tufenk (fuzil) i ampeso a asperar delantre la puerta. Porke si reushiya a entrar el “inkonosido” lo iva detener para protejar su famiya. Su madre se fue al lado las kriyaturas para kudyarlos. Un poko despues se kalmo el bruyido. Mas despues yene ampeso, yene se kalmo.
Ansina asperaron asta la demanyana kon espanto.
La demanyana kuando ya amanesyo un poko, de muevo ampeso el mizmo bruido ke ya se estava kaji rompyendo la puerta.
Kon muncha atansyon i sin meneyarsen muncho avriyeron un kantoniko del perde, para mirar abasho. Ken es ke esta ensistyendo para chafteyar la puerta. Eyos ke ven? Un lonso ke se estava fregando a la puerta para araskarse la espalda.
Ya tomaron un reflo siguro. Enfortesyeron la puerta para ke no afite otra vez este modo de espanto.
Un tiempo despues afito el fuego en Salonik, todos los judios se fueron a otros payizes, al lado de sus konosidos o paryentes. I eyos vinieron a Estambol i se transferaron a Makriköy ke es agora Bakırköy. Yene a morar en la gar de treno.
