A vezes pensamos ke la situasion esta tan negra ke nunka puede trokar i ke tenemos menester de un miraklo para ke las kozas troken. Pensamos ke nunka la situasion va mijorar.
En el pasado, munchas vezes me metieron a la puerta. Me paresiya ke mas no va pueder topar echo. Mezes i mezes, estava abatido. Pensava tambien ke por eternidad va kedar muchacho, dingunos no van a kerer kazarsen kon mi. Diziya ke kale un miraklo para ke todo se endereche. Mezmo si mos kreemos en miraklos, diziya yo ken so, ke el Todo Poderozo aga un miraklo por mi. Ize tantos yerros ke no meresko un miraklo.
Si realmente mos kreemos ke un miraklo puede afitar, mos vemos dinyos de un miraklo. Los savios mos ambezaron ke todo es posivle a traves del poder de la esperansa i de la fe. Si te enkontras kon una situasion ke estas pronto a ezvachearte, ma ke en lugar de esvachearte, en lo mas profondo de tu korason, krees ke el Dio puede trokar las kozas, i ke tu le demandes ke todo se endereche, en este momento oskuro, tener fe te aze ganar un grande merito.
Ma, date kuenta ke nada es emposivle por el kreador del universo. Si el puede krear este mundo entero, puede tambien krear los trokamientos ariento del universo, i lo ke keres se puede realizar. Ma, kale ke keras kon todo tu korason para ke el te ayude. Las kozas van a trokar sin ke te des kuenta.
