Keridos amigos ke no son aedados ma ke se estan aziendo aedados. Mos egzaminaremos i daremos nota de 10/10.
Estos son los 10 konsejos:
1- Si te espertas demprano la demanyanika kon tu despertador o tu selular, kon el kanto de los pasharos o otros sonidos, konsiderate orozo. Esto sinyifika ke dainda sos parte de este mundo.
2- Despues de espertarte, beve un poko de agua i manda mesajes o tekstos a las personas ke konoses, ke amas i son emportantes para ti. Dizeles “Buenos diyas”. Esto sinyifika ke puedes pensar, i sos saludozo. Puedes ampesar un muevo i ermozo diya.
3- Si resives mesajes de tus amigos ke te envitan a komer o tomar un kafe, kere dizir ke tienes buenas relasyones kon la djente. Sinyifika ke tus amigos dainda estan pensando en ti.
4- En vezes, algunas personas pueden avlar mal de detras de tu espalda. Esto kere dizir ke sos una persona muy emportante para eyos. Siguro ke estas personas no son tan buenos en la vida. No son komo ti. Deves de sintirte oroza/o.
5- Si te preokupa ke sos remetida, si komes bien i kon buenos nutrientes, no te merikiyes. Todos los konsejos i diskorsos sovre la salud son bazadas sovre la alimentasyon. Aze egzersizes i todas las kozas, kon kontrol.
6- Si sales kon tus amigas/amigos, komesh, diskutish, viyajash, kere dizir ke tenesh sierto s standartes en vuestra vida.
7- Si tenesh un buen sentido de umor, esto sinyifika ke sos mansevo de korason i tienes buena salud.
8- Si tienes mas de 65 anyos, sientete orozo i sientete kontente. Asigun un estudio mundial, solo 8 de kada 100 personas tienen mas de 65 anyos.
9- Si puedes salir a merkar kozas para gizar, si puedes ver bien, si puedes oyir bien, si saves uzar tu selular para mandar mesajes o tekstos, si estas eskriviendo tus rekuerdos, si estas eskriviendo una istorya, es ke tienes una vida muy reushida.
10- Si estas meldando este mesaje i tienes una sonriza en tu kara, es ke sos una persona muy oroza i kontente.
Aparte de esto los doktores mos dan konsejos ke kale ke bevamos muncha agua. Aparte ke devemos de bever entre el diya, kale bever i antes de irmos a echar i si mos espertamos a medya noche, kale ke bevamos otro un poko de agua. Kale evitar las frituras i alimentos rikos en arina o nishasta.
Otra koza ke todos ma todos los doktores mos rekomendan es de azer egzersizes regularmente. Vos kero konfesar ke este konsejo no me plaze del todo.
Diyas i anyos saludozos.
