Kreo ke los 4 anyos ke vienen, a lo manko una vez al mez vamos a bivir un shok kon las deklarasyones del prezidente Amerikano, Trump. Kreo i espero ke no va pueder realizar todo lo ke pasa de su tino. Tomar el payiz Kanadiano; tomar el patronaje del Kanal de Panama; tomar las tierras del payiz de Groenland ke apartyene al payiz de Danemark. Kere todo.
La semana pasada dyo deklarasiones sovre Gazza. Dyo karar ke todos los ke biven aya deven de irsen a otras tierras. Al Ejipto; a la Jordania o otros payizes. I su proyekto es de fraguar i formar una Riviera en Gazza. Kreo ke esta vyendo suenyos. Ande se pueden ir estos dos miliones de personas. I todas las personas se van a ir a la mar a Gazza.
Kreo ke esta semana kon los 3 rehenes ke toparon sus libertad, bivimos munchas ansyas kon los rehenes ke van a tornar. Estos tres ombres malorozamente no estavan en una buena situasion. Eli Sharabi (52); Or Levy (34) i Ohad Ben Ami (56) tornaron en un estado atristados. Uno entre eyos komo estava atado mezes i mezes kon una kadena se olvido mizmo de kaminar; i es los mezes dalkavo ke lo liberaron i empeso a kaminar. Una desgrasia. I syertos Palestinianos entre 72 prizonieros ke fueron liberados estan en los ospitales palestinianos.
No savemos lo ke va afitar kon los ke van a vinir. No savemos mizmo si estan sanos o no. Espero ke esto todo va topar fin en kurto tyempo i estos israelyanos ke estan mas de kinze mezes en las manos de los militanes del Hamas van a topar sus libertad.
Esta semana topi la posibilitad de ver dos filmos en el sinema. Los dos son filmos ke pueden resivir premios de Oscar. El primer era un filmo de tres oras i media. La vida de un ombre Djudio de la Ungaria ke se fue solo a los Estados Unidos. Un arkitekto muy famozo en Ungaria i ke reusho (?) en los Estados Unidos. Es dospues ke tuvo el mazal de estar endjuntos kon su mujer ke no puediya mas kaminar i su sovrina ke no puediya avlar. Komo teniyan syertos problemes a la fin se fueron a Israel. No se si en los anyos 50 i 60 los Djudios de las Amerikas si tenian tantos problemes.
El segundo filmo era sovre el Vatikan i la eleksiyon del muevo Papa. No se si konosesh el sistema de la eleksyon. Todos los kardinales se arekojen i no tyenen dinguna relasion kon el eksteryor. I kontinuan a votar asta ke un de los kardinales resive los votos abastesyente para ser Papa fina la fin de su vida. I bivimos esto kon todos los problemes de los kandidados.
Kreo ke ay munchos filmos ke son kandidados para los premios de Oscar.
