Kuando mos desidimos ir al Leshano Oriente kon los amigos, pensi ke si mos vamos kon Malezia Air a Bangkok i azer stop en Kuala Lumpur, puediamos ver i kaminar este sivdad. Por esto preferimos de irmos antes a Kuala Lumpur i despues a Bangkok. Apartimos otros dos diyas para Singapur. Ivamoz ir solo a Bangkok ansina mos se fado kaminar 3 sivdades. En tornando dishimos ke bueno ke izimos este viyaje ansina. Kaminimos i konosimos diferentes kulturas en 10 diyas. Kuando abashimos a Kuala Lumpur kedimoz maraviyados de esta sivdad. Porke no estavamos asperando de renkontrar un sivdad asi. En Malezya biven de relijyon, 65% Muzulmanos, 20% Budistos, 5% Hindus i 10% de Kristyanos. Toda la djente biven endjuntos en pas. Ke karar de enteresante estavan las fraguas. Aki se topan las kulas buchukas las mas largas del mundo ke se yaman Petronas. La arktitektura estava un poko komo los arabos, un poko komo Leshano Oriente i tambiyen komo Evropa. Los templos kada uno estava diferente. Los templos de los Hindus, de los Budistos i aviya una meshkita muy grande. Este karar de diferentes kulturas teniyan tambiyen diferentes komidas ke estavan muy enteresante. Komo todo el Leshano Oriente, el arroz estava el primer alimento del mupak de Malezya. Los kondimentos son, el bambu, el soya i las soses. Demanyana en el otel era el dezayunu kon bufe. Kreyevos no topimos munchas kozas de komer. I la demanyana aviya en el bufe materyales de arroz diferentes diferentes. Pishkados salados, Noodles diferentes, unas kuantas kozas topimos para komer. Komo Omlet ke se aze kon guevo, manteka i dulses ke izyeron kon las frutas spesyal de aki. Una noche mos yevaron a un restorante ke aviya un Show kultural de Malezya. El bufe estava bien yeno ma no topimos munchas kozas para komer. Aviya ezgaras de lumbre al lado de los bufes, estavan azyendo karnes i gayinas asadas kon miel i soses pikantes. En el bufe de salatas aviya munchos djeneros. Una deya aviya ke me plazyo la vista estava komo una guerta. Miri el nombre era Kerabu. Le demandi al shef ke estava al lado de las salatas i me dyo la resefta.
Materyales
4 fasulyas kortadas komo sherit
1 pipino kortado komo sherit
1safanorya kortada komo sherit
1 revanada de Ananas kortada en kubos
½ Mango kortado en kubos
4-5 ojas de menta
4-5 ojas de bazil
4-5 ojas de kishnish
Para la sos
3 Kucharas de supa de Limon
1 Kuchara de supa de Miel
1 Pimyenton kolorado pikante kortado delgado
1 Kuchara de agua de pishkado
2 dientes de ajo
El aparejar
Todos los materyales eskritos ariva se meten aryento de un chini ondo.
La sos ke se apronto i se karishtireyo se echa ensima de los materyales i se desha eskansar medya ora en el frijider.
Los ke biven en Malezya mos disheron ke komen esta salata al lado del arroz ke yaman “Nasi Lemak” o “Nasi Goreng”
