Me vino al tino en supito ke la kaza de Galata ande moravamos en mi chikes, teniya tavanes muy altos. Tan altos ke metiyamos una siya ensima la meza i mos suviyamos aya para enkolgar los perdes a las ventanas. Me akodro ke en la pared aviya una linya maron, 20-30 sentimetros mas abasho del tavan. Los enkaladores lo desinavan kon una regla. Los tavanes eran blankos asta la linya i despues de la linya, las paredes eran krem. Un diya salyo las pinturas (boya) de kolor. Todos diziyan “es la boya del DYO” porke la marka de la pintura era DYO, ke es lo kurto de “Durmush Yashar Ogulları”. Salyo pinturas de kolores kolores. Mos plazyo muncho. Ya mos aviyamos enfasyado de tener todo la mizma kolor delantre los ojos. Ke izimos? Merkimos un kuti de kada kolor. I pintimos kada kamareta kon una kolor diferente. Blu, roz, lila i mas. Estava muy alegre. Metimos los nombres de las kamaretas asigun su kolor. Por egzempio, antes diziyamos la kamareta de echar, despues de la pintura ampesimos a dizir la kamareta blu.
Komo esto, las ventanas mizmo eran otro modo. Se avriyan de abasho para ariva i se deteniyan kon unos ganchos. Se keriya brasos para alevantarlas. Las ventanas no eran muy grandes komo las de agora. En una kamareta se topavan 2 o tres ventanas. Se metiya un tul i ensima unos perdes de goblen ke se deteniyan al kenar kon dos fyongos de en medio. Los teles de elektrisita pasavan por aryento de unos buris de fierro estrechos i estos no estavan aryento las paredes, pasavan por ensima las paredes. La mizma koza kon los buris de gaz. I estos pasavan por en medyo de las paredes asta la kozina.
En la majorita de las kazas aviya mushamas en basho. Se metiya kartones ensima de las tavlas, despues se metiya las mushamas. Asta ke salyo el plastik, las mushamas teniyan mantar por debasho, ansina el mantar protejava la mushama i no deshava pasar umidita.
Agora vineremos a la arshitektura de muestros diyas. Los tavanes no son mas tanto altos. Las ventanas tienen dos alas, ke se avren de en medyo para afuera. No se kere fuersas para avrirlas. Uvo un tiempo ke las ventanas ampesavan de una punta i eskapavan en la otra punta de la kamareta. Mas no estan aziendo este modo de konstruksyones. Las enchikesyeron las ventanas por ekonomiya de kalor. En basho agora kaje en todas las kazas se topa parkes de tavla. En invyerno no mos yelamos i en enverano no mos kayentamos. Los teles de elektrik i los buris de gaz pasan por aryento las paredes. No ay mas “polusyon vizual”, ke mos deranja la vista.
Ken save despues de 50 anyos ke modo de kazas i arshitekturas vamos a ver. De agora ya ampeso a salir kazas entelijentes. Ke mizmo si estas en la kaye puedes komandar kon un boton todo lo ke keres en tu kaza!
