Kuando mos fuimos a Sud Amerika, kaminimos 3 paizes. Brasil, Argentina i Uruguay. Las sivdades Buenos Aires, Rio De Janerio, Sao Paulo, Colonia de Sacramento estavan muy ermozas i enteresantes. En el frontyera de Argentina i Brasil mos fuimos a las kaskadas Iguazu ke kuando las vimos kedimos kon las bokas aviertas. Solo de ver i oyir el bruido ke estava salyendo, estava una lokura. Si demandash por las sivdades ke vijitimos, kada una estava mas ermoza de la otra. Colonia de Sacramento es una sivdad de Uruguay serka de Montevideo. Parese Kazal de Peshkadores. Demanyana pasimos kon feribot i a la noche tornimos a Buenos Aires. Una sivdad chika ma muy sempatika i turistika. Komimos i gostimos diferentes savores en Colonia de Sacramento.
Buenos Aires es una sivdad muy grande. Las kayes, las guertas, todo estava grande. La Kaza Rosada ke avlo en el balkon Evita Peron estava muy enteresante. El Rio ke se yama Tigre, la Iglesia grande, el bario Recoletta, el Simiteryo, el distrito otantiko ke es La Boca. Kuando se dize Argentina viene al tino el bayle Tango. Una noche mos yevaron a ver el Show de Tango al Teatro Colon. Kedimos muy kontentes de konoser i kaminar esta sivdad. La komida spesial de esta area es la Empanada i las karnes asadas. Kuando gostimos i komimos estas komidas, ivamos a komermos i los dedos!
Rio De Janerio estava mas diferente de Buenos Aires. En primero la lingua supito se troko. De Espanyol paso al Portugez. La djente estava mas brunos. Komo diziya Sezen Cumhur Önal son djente de kolor de shokola. Las playas muy largas. Copa Cabana i Ipanema. La guerta Botanika Tijuca, el monte Loft, el monumento de Jesus ke esta en el monte Corcovado, la kaye ande se aze el Karnaval de Rio. Una noche mos fuimos a ver el Show de Samba.
Ya savesh ke el sujeto de estas eskrituryas son las salatas ke komimos en el mundo. Agora vos kero kontar la salata ke konosimos en Rio de Janerio, Salat Salpicao. Kuando mos yevaron a un restorante para komer karnes i pishkados asados aviya en el medyo del restoran el bufe de salatas. Aya vide una salata diferente i le demandi al chef ke estava al lado de la meza ke es esto? I me ekspliko komo se aze la salata Salpicao. Es una salata de gaina.
Los Materyales:
150 gr la karne blanka de la gaina eskaldada
1 Karota se raya
1 Mansana kortada delgada
1 Pipino se raya
1/2 Kupa de chay de maiz
1/2 Kupa de chay de bizelya
1/2 Kupa de chay azetunas sin kueshko
1/2 Kupa de chay uva seka
3 Kayisis kortados delgados
Para la sos:
2 Kucharas de supa de mayonez
2 Kucharas de supa de yogurt
½ Limon
Sal
Para aparejar:
Aryento de un chini ondo la parte blanka de la gayna se desmenuza.
Los zarvavates i las frutas eskritos ariva se meten ensima.
La sos se apareja endjuntos i se karishtereya i se mete ensima de la salata.
Unas kuantas oras se mete al frijider para eskansar i despues se traye a la meza.
En vezes meten ensima patatas fritas kortadas komo kibrit.
