Yo so Leah. Estava lavorando en un laboratorio. Akel dia estava en el laboratorio. Avia eskapado mi echo, entri a la sala del frizer para meter en sira los likidos. Djusto ke estava salyendo de la sala, la puerta se serro otomatikamente. La puerta no teniya alternativa de avrirse de aryento. Empesi a gritar, empesi a chaftear a la puerta, yorando por ayuda kon la esperansa ke alguno puediya vinir a salvarme, ma todos mis esfuersos fueron en vano. Dingunos no vino a ayudarme, todos los funksionarios ya se aviyan ido. Indimas, era emposivle de oyer dinguna boz ni de aryento ni de afuera.
Paso dos oras, deshi de gritar por ayuda. Aviya perdido mi esperansa. Otrun poko, ya me iva murir. No estava puediendo suportar el friyo. La temperatura del frizer no puediya trokar. Mi puerpo se aviya echo buz. "Ya vino la fin" dishe. Mis ojos empesaron a serrarsen.
Enduna oyi ke se avriyo la puerta. La guardia de la enstitusion avriyo la puerta. No estava puediyendo kreyer mis ojos. Ya aviya perdido toda mi esperansa. Grasias al milagro estava en vida. Le dishe a la guardia: "Munchas grasias. No puedo agradeserte bastante. No me esto kreyendo. Me paresyo ke me estava muriendo. Me salvates la vida. Komo puedo pagarte?"
La guardia me respondio: "No tienes menester de pagarme. No me deves nada i yo no ize nada espesial, solo estava akumpliendo mis responsabilidades". Le demandi a la guardia kon kuriozidad komo entendiyo ke estava enserrado en el frizer porke no se estava oyendo nada de afuera. El guardia me respondio: "Ay vente anyos ke esto lavorando en esta enstitusion. Miles de personas lavoraron aki en estos anyos. Ma no atiri la atansion de dingunos. Por eyos no fui tan emportante. Ma tu, no fuites komo eyos. Kada demanyana kuando vienes al laboratorio me saludas. Siempre me saludas por la noche antes de salir del laboratorio. Espero kon kuatro ojos tus saludos de kada dia. Me azes sintir ke tengo una valor en esta kompanyia. Oy me saludates por la demanyana en entrando al laboratorio. Dishites buenos dias komo los otros dias ma no me dishistes adio. Oy no te vide en salyendo, no resivi tu saludo por la noche. Kedi en kudyado sovre lo ke se paso. Me desidi de echar un ojo a la fabrika. Empesi a kontrolar todas las kamaretas una por una. Ansi fue ke te topi en la sala de frijideres".
Estava tan emosionado en este momento ke las palavras del guardia realmente tokaron mi korason. Mis simples buenos dias i adios a un guardia de fabrika me salvaron la vida. A las vezes muestros komportos chikos pueden tener un grande efekto en las personas de muestro entorno. Komportate kon todos kon el respekto ke meresen.
