Keridos lektores,
Dospues de sinko diyas en el ospital, bendicho el Dyo ya vine a mi kaza. Este invyerno no se deke, pasi tres vezes grip de sorte ke la dalkavo fue puntada i me echó en kama, fui ovligada de echarme al ospital. No vos va kontar las orikas malas ke pasi, porke no me plaze avlar de hazinuras i detesto las ke kontan kon la sal i la pimyenta una abashada. Dingunos ke no manken de sus kazas, la sanedad es muy emportante, pasado seya diremos.
Esta semana fyestimos la fyesta de los arvoles de la natura ke se arebive “TU BISHVAT”.
Es kuryozo apenas fyestamos esta fyesta, remarkamos ke en los arvoles kresen rozikas de kolores a kolores, mezmo en las plantas ke tenemos en kaza ay un despertar, las ke estavan amariyas i amahadas empesaron a dar brotes verdes.
Oy en diya la umanidad tyene problemes ekolojikos. Estamos vyendo ke ay siglos i siglos ke la Tora eskrive las reglas de respektar la tyerra. Ma mozotros malorozamente estamos destruyendo la natura por no aplikar estas reglas. Muestro emportante dover es, protejar la natura i los arvoles. Ma mozos ke izimos, embatakimos las mares en echando syerkol, kortimos arvoles, mezmo dimos danyo a los animales. Kurto, rovimos i destruimos la erensya de muestros ijos.
Tu bishvat mos da mesajes muy espesyales. Las verduras i los arvoles, no se plantan solo en la tyerra, sino tambyen se plantan en muestras almas. Nuestros ijos, de vez en kuando se van a paizes etranjeros, donde ayi ay filozofias etranjeras. Kuando estan leshos de sus famiyas se pueden deformar. Ma mozos si plantimos muestra kultura i les ambezimos la Tora, en todo lo negro, van a enfloreser kon lo ke les ambezimos. I esto es muestra garantiya de protejar muestras tradisyones i la asigurasyon de la kontinuasyon de muestra nasyon.
Vos oguro en primero sanedad, pas i amor en los korasones, en el mundo i en muestro paiz. Amen.
