Esta vez vos va eskrivir sovre un evenimyento muy importante en la istorya Djudia ke afito en el mez de Febrero.
El 5 de Febrero de 1840, un papaz, el kapuchino Thomas, un italiano ke aviya bivido durante muncho tyempo en Damasko, dezaparesyo djunto kon su sirvyente muzulmano, Ibrahim Amara. En el empesijo pensaron ke en savyendo ke el papaz teniya relasyones kon negosyos no muy kasher, los dos ombres probablemente fueron asasinados por la “mafya” kon ken Thomas se aviya peleado. Ma, los kapuchinos imediatamente difuzaron el avizo ke los Djudios aviyan asasinado estos ombres para utilizar sus sangre para la matza de Pesah!
Komo los Katolikos en Sirya estavan ofisyalamente debasho la proteksyon franseza, la investigasyon deviya ser realizada por el konsul fransez segun la ley lokal. Ma el konsul, Ratti-Menton, se aliyo kon los akuzadores i supervizyo la investigasyon djuntos kon el governador jeneral, Sherif Pasha; i esta investigasyon kontinuo de una manera ke se puede yamar barbara. Un barbero, Solomon Negrin, fue arestado arbitraryamente i torturado asta ke se le aranko una "konfesyon" segun la kual Thomas i su servitor fueron asasinados en la kaza de David Harari por syete Djudios. Los ombres ke nombro Negrin fueron arestados imedyatamente; dos de eyos muryeron en la tortura, uno de eyos se konvirtyo al Islam para salvarse i los otros fueron ovligados a “konfesar”.
No abasta esto, un sirvyente muzulmano al servisyo de David Harari, debasho de la presyon de los akuzadores disho ke Ibrahim Amara fue asasinado en la kaza de Meir Farhi, en prezensiya de Farhi i otros notables Djudios. La mayoria de los mensyonados fueron arestados, ma uno de eyos, Isaac Levi Picciotto, era de la suditensya austriako i estava debasho de la proteksyon del konsul austriako. Su suditensa finalmente travo la atansyon i la intervansyon de Austria, Inglaterra i los Estados Unidos por este kavzo.
Kuando se toparon unos guesos en un pozo en la maale Djudia, los akuzadores sin ezitasyon proklamaron ke eran los de Thomas i los enteraron kon una grande seremoniya. En la enskripsyon sovre la pyedra de la tomba estava eskrito ke era la tomba de un santo torturado por los Djudíos. Otrun poko tyempo despues se topo otros guesos, los de Ibrahim Amara! Ma un doktor famozo de Damasco, el doktor Lograso, no kijo sertifikar si se tratava de guesos umanos i demando ke los guesos fueran embiyados a una universidad europea para su egzamen. De vista el konsul fransez se opozo a esta demanda. Las otoridades anunsiyaron entonses ke, sovre la baza de las konfesyones de los akuzados i los guesos topados de las viktimas, la kulpabilidad de los Djudios en el doble asasinato estava provada sin lugar a dubyo.
Las otoridades tambyen sekuestraron a 63 kriyaturas Djudias para ekstorsiyonar a sus madres el lugar ande eskondyeron la sangre de las viktimas.
Kualo afito despues? Komo se dize en el jurnalizmo, en muy serka en esta oja!
