Tu-Bishvat es el 15 del mez de Shevat. El anyo muevo de los arvoles… El empesijo de la primavera.
Las mezas son yenas de frutas i produktos de la tyerra.
Trigo i produktos derivados.
Vino, igo, agranada, azituna, datile, uva, mansana, muez, banana, karota, melon i frutas sekas.
Despues ke se disho todas las berahas i se komyo todas las frutas, se toma un limon en la mano i en golyendolo se dize una beraha diferente.
Es en Tu-Bishvat ke Dyo desidio ke los arvoles sean fruktiferos, unos de eyos van a kreser, otros se van a sekar i se van a murir.
Egziste una uzansa vyeja ke endika a los padres de sembrar un sendro (arvole sedir) kuando nase un ijo, i un sipres en el nasimyento de una ija. I en la boda de estos mansevos, los ramos de estos arvoles van a ornar la sinagoga
ande se van a kazar.
Esta fyesta afirma la relasyon ke egziste entre el puevlo djudyo i su tyerra. Ya savemos ke el puevlo ebreo fue orijinalamente agrikultor, i tiene un amor profunda a los arvoles. Estas selebrasyones mostran la emportansa ke dan los djudyos a esta fyesta.
Kale demandar esta demanda:
Ke es tan sinyifikativo en los arvoles, ke fyestamos sus anyos muevos?
La Tora dize: Deke la persona es un arvole de la tyerra?
Ke es la sinyifikasyon de esto?
Mos puedemos ambezar de los arvoles kozas muy emportantes para muestra vida.
Los arvoles syempre tyenen una influensya pozitiva enriva de la atmosfera, del tyempo i del entorno.
Eyos dan frutas, solombra, abrigo a las bestyas, dan oksijeno a la tyerra, avizan la erozyon i dan umidita a la tyerra.
Tu-Bishvat es la fyesta de la NATURA.
El arvole es el sembol de la VIDA i del SAVER.
La Tora es el orijin de la saveduria, de la konosensya, es el oksijeno de los djudyos.
Ma la konosensya no tyene valor kuando es sola, kuando no es entornada de otras kozas.
Kale tomar fuersas de las tradisyones ke son muestras raizes, para pueder tener un futuro reushido.
El ombre es komparado a un arvole de kampo porke kon sus kualidades syempre el se developa i a la fin i el da frutas, ke son los ijos.
Kale kontinuar a selebrar todas las fyestas, para ke los mansevos se ambezen muestras tradisyones i ke lo realizen fina la fin.
Para kada anyo mijorado!...
