Esto eskrivyendo este artikolo de Londres, sivdad ande moran mi ija kon su marido i mi inyeta. I yo kon mi mujer a lo manko una vez al anyo mos estamos indo a vijitarlos. Londres es una sivdad ande biven 8 milyones i medyo de personas. Ma reelmente no se save kualo es la proporsion de los Inglezes. En la Inglatiera moran mas de 850.000 turkos i los 450.000 en Londres. Los 5 por syen de los sivdadinos de Londres son turkos.
Reelmente los turkos dyeron muy grande emportansa a este payiz.
Ma malorozamente un haber negro mos vino de esta sivdad. Muestra amiga, Lizi Behmuaras ke lavoro munchos anyos para el Şalom i despues eskrivyo munchos livros, la mas grande partida biografias se murio en Londres. I yo estava aya.
Reelmente me atristi muncho kon esta piedrita. Lavorimos a lo manko 15 anyos endjuntos. Kuando teniamos sedutas en el Şalom eramos los dos ke moravamos en la partida Asiatika de Estanbol. I tornavamos endjuntos.
Asta su muerte no saviya mizmo ke estava dezrepozada i ke tenia su doktor en Londres. Lizi, ke tu alma repoze en Gan Eden.
Es de muevo diya de shabat, muy presto ke mi mujer abasho al lobi del otel para pueder ver en la television israelyana lo ke va afitar a los tres rehenes ke van a deshar los milises del Hamas. Grasias al Dyo esta semans no bivimos ls mizma koza. Los rehenen estavan en una situasion mijor de los ke vinieron la semana pasada.
Mos kedo dos semanas para kompletar la primera partida; i solo 6 rehenes van a topar la libertad. Ke mazal. Yo espero ke en poko tyempo todos van a topar sus libertad.
Bivir i ver…
